韋斯咸響前日輸埋畀熱刺後，響超聯暫得一分包尾，領隊羅達自然成為超高危領隊，最慘係佢重俾迪肯尼奧用粗口問候，好似慌死佢唔夠衰咁，真係一沉百踩囉。
話說當冼佳亞為韋斯咸追成二比二後，羅達隨即換出迪肯尼奧，用卡域克加強防守，傳媒報道當時迪肯尼奧即刻好大聲咁對住羅達講粗口，嚇到羅達呆晒。呢單嘢反映迪肯尼奧好唔妥羅達之餘，有口痕佬甚至估迪肯尼奧密謀羅達職權，重唔乘機踩佢就勢係假。
話時話，想唔想知羅達事後點回應迪肯尼奧？佢話：「迪肯尼奧都係想振奮士氣啫！」嘩，羅達兄你俾人踩到咁都唔還擊，真係唔死都……。
比亞荷夫響前日基爾禾作客拉素場波有士哥兼踢到識飛咁滯，睇佢下半場「扯晒蝦」兼抽埋筋都無俾教練換走，就知佢響隊波幾重要。佢係咪老馬虛火就唔敢講，但佢似乎明白淨係食老本用頭槌唔實際，所以前日猛咁墮後射波，咁老重可以轉型，抵讚。
好波嘅球員總有啲脾氣，好似富林明斯前鋒羅馬里奧響球隊前日吞聖保羅六蛋嘅比賽，唔滿意一個後衞隊友踢得差，兜巴摑向對方。查實羅馬里奧當初決定投富林明斯，就應該預咗隊波實力麻麻，真係自己搵嚟勞氣，而佢咁樣對隊友就點計都唔着，最無品係呢隻老馬唔肯道歉㖭。
著名樂隊Oasis響禮拜日曼城和布力般二比二場波捧曼城場，坐貴賓廂座本來每位要畀一千五百鎊，曼城方面好大方免費招待明星。場波曼城好辛苦攞到一分，賽後成班球員同Oasis一齊去慶祝，點知Oasis事後向曼城收番三千鎊表演費，真係唔知咩世界！