楊紫瓊（Michelle）同男友鍾再思嘅電影公司，早前計劃搵埋好拍檔鮑德熹開拍一套電影《花木蘭》，點知曾經同Michelle合作過《警察故事3之超級警察》嘅唐季禮，又話要開一套《花木蘭》，搵同佢鬧緊緋聞嘅林心如擔正，搞到電影未開拍就鬧雙胞。
不過唔講你唔知，原來中央電視台曾經製作過一部電視劇《花木蘭》，重註冊攞埋電影版權個名，所以有人想拍套叫《花木蘭》嘅戲，都要得到佢哋同意。Michelle就醒，知道呢件事之後即刻上內地同中央電視台傾，重花兩萬蚊人民幣（約港幣一萬九千元）買埋電視台早前拍劇用過嘅道具，電視台見Michelle盛意拳拳，梗係立即畀個《花木蘭》電影版權佢啦！另外，Michelle套《天脈傳奇》啱啱攞咗中國文化部頒發嘅華表獎「最佳合拍電影」。
不過唐季禮就慘啲，就算佢將來開拍花木蘭嘅故事，都唔可以用《花木蘭》做電影名，佢女友林心如做唔成花木蘭，唔知會唔會同Michelle冇friend做呢？
有一架「尚健醫療器材公司」嘅貨車，噚日朝早十一點左右喺籮記屋企附近出現，原來係送一部氧氣機上籮記屋企。但係個送貨工人最初都唔知個入口喺邊，要記者話個正確地址畀佢知。據知呢部氧氣機值兩至三萬，可以提供新鮮嘅氧氣。不過，隔咗一陣個工人又推另一部舊機落樓，睇嚟籮記係換咗部新機。
性感女星自從識咗內地band友之後，就極度沉迷喺呢段戀情度，乜都聽晒男友話，經常漠視經理人嘅存在，擅自處理工作上嘅嘢，最後當然係同經理人翻臉啦！不過性感女星都唔知驚，以為band友男友真心愛佢同幫佢，搵埋佢做經理人，但個band友就幫佢接埋啲唔啱佢級數拍嘅戲，要女星推咗啲可以喺國際影壇發展嘅演出，接套喺內地拍嘅電視劇做大茄喱啡，性感女星都聽聽話話照做，愛情真係令人盲目。
香港電影工業近年嚟真係較差，所以九大電影屬會都想搵政府幫手。聽日九大屬會代表就會同工商及科技局局長唐英年開會，馮仁昭聽啲導演講，其中一個同政府提出嘅方案，係想搵政府做擔保，等電影公司可以問基金借到約七成資金嚟開戲，其餘三成資金風險就由業界人士自己承擔，聽聞寰宇電影公司老闆林建岳向唐英年探過口風，答案係冇可能通過呢個建議。
有錢仔一向都唔生性，搞到佢老竇好鬼憎佢。嗰陣佢同有錢女搞姊弟戀，佢老竇都唔撐佢，但原來有錢仔未同有錢女拍拖之前，竟然曾經同有錢女個妹拍拖，不過係玩玩吓幾日就冇嗰隻。有錢仔私生活咁亂，佢老竇又點會唔激氣！不過最近有錢仔識咗個鬼妹，感情穩定，有錢仔重成個人定性咗好多，積極工作，重做到好多大生意，連佢老竇都信任番佢！
嚟自東南亞嘅亞熱帶小姐，佢一度喺電視圈有過好好嘅發展，可惜佢嘅緋聞不絕，呢位風騷靚女重試過同個有婦之夫男藝人傳緋聞。不過，好景不常，自從亞熱帶小姐早前黐咗個外籍男友之後，星途就一直急降，經常都賦閒在家、百無聊賴，佢最近重成日同一個金牌經理人交往，希望可以搵個救生圈，以解荷包乾硬化之急。
無綫劇集《皆大歡喜》經常有一啲夢境戲嚟吸引觀眾，十分鬼馬。日前佢哋又再拍攝夢中戲，今次薛家燕同梅小惠等都化做宮女，而苑瓊丹同李國麟就俾人陷害飲毒酒，幸好佢哋醒目，逃過大難，苑仔同李國麟拍攝時玩得興起重即場互咀，場面搞笑。
任賢齊、琦琦同佢老公任達華，前日齊齊飛咗去上海，出席Omega喺上海舉行嘅五十周年發布會。咁啱俄羅斯美人古妮高娃又喺上海打網球，所以四個代言人齊齊出席盛會。聽講古妮高娃成晚同琦琦佢哋密密斟，風騷到死，唔講都唔知佢啱啱輸咗波！