高官問責制初登場，巧遇細價股事件，一高一細，互相牽制，各單位、崗位、團體各展所長，大做文章。
研究報告出來了，相信百分之九十的香港市民也沒有詳細閱讀該報告，只重點地知道四眼馬先生毋須負責任，冷面鄺先生則須負行政責任。奇怪的事情發生了，報告未出來之前，市面一直有聲音要求四眼馬先生道歉，但均遭到拒絕。報告出來了，四眼馬先生唔知點解毋須負責，四眼馬先生更唔知點解地在一個風雨飄搖的八號風球日子，突然又肯公開鞠躬道歉。那邊廂需要負行政責任的冷面鄺先生，一如過往冷面帶笑地說了一句：「公道自在人心。」
傳媒高調地處理這新聞，電視畫面不斷見到四眼馬與冷面鄺的片段。照計呢件事件應該係相當白紙黑字，該誰負責就誰負責的事件，並唔係搞大女仔個肚睇吓邊個肯認數嘅糊塗帳，點解會研究一大輪之後，有人好似非常不情願地道歉，又有人又講晦氣說話？
香港𠵱家真係幾水深火熱，真係好需要一班叻人切切實實地為香港做事，呢班叻人出盡十二成功力都尚且未必救到香港，如果重要分心搞小圈子、派系鬥爭、我想你死、你想我難睇；邊個死就未知，香港一定死先。
希望香港的領導班子，能真心真意為香港人去想、去幹，其實咁多位大哥大姐都早已盤滿缽滿，若然唔係真係想做啲嘢，不如早啲返屋企聽吓音樂撚吓雀算數。
誰若只有興趣搞小圈子人事鬥爭，請移玉步站出來，讓香港七百萬市民逐個踢你籮柚。