傷盡小股東心的八號仔電訊盈科，股價噚日繼續跟隨大市回落，一度低見1.08元，最終則收報1.14元，跌0.05元或4.2%。其實好多電盈股東都好似八方咁，對股價已麻木，事關由○○年八月小小超李澤楷掌政至今，股價屢創新低，同當時的股價15.35元比較，跌逾9成，可算是恒指成份股中表現最差嘅一隻，亦係所有成份股中最低價一隻，恒生指數服務公司真係應該考慮將之剔出藍籌之列。
不過，若然藍籌冇得做，部份基金受條款限制，不能持有非恒指類股份，屆時電盈又可能再遭拋售。上星期八號風球當日，前電盈高層現財經事務及庫務局局長馬時亨於電視前道歉，其實李澤楷都應該向小股東鞠個躬！
話分兩頭，股價雖無起色，但電盈查實亦好努力維持服務質素。好似本月底終止互動電視服務（iTV）咁，已獲有關當局正式批准，今個星期會向現有客戶發出通知。雖然聽講iTV只剩低幾千個客，但係亦有提供優惠價格等佢哋轉用網上行寬頻服務，並可免費享用now.com.hk基本內容一年，都算係咁啦。
傳真︰2623-9278
電郵︰