水果中除瓜之外，我肥師奶都幾鍾意食梨，繼早前上市早酥梨後，最近喺果檔出現嘅則有沙梨，係另一抵食之選。沙梨主要嚟自湖北，果皮綠綠啡啡，外貌唔多吸引，但勝在抵食夾大個，一個有成個拳頭大，十蚊有六、七個，榨汁飲都抵啦。沙梨質感爽脆，不過啲皮會比較粗嚡，所以食嘅時候最好先㓟皮，咁就又清甜多汁，滋潤喉嚨最啱食。
$10/6-7個
各大果檔有售
劍魚係平日街市魚檔較少有得賣嘅魚，通常都會係西菜烹調用到較多。劍魚大起嚟有成十五呎長，通常都係生活喺暖水嘅海域，今次介紹嘅劍魚就嚟自菲律賓。劍魚有個好似劍咁尖咁長嘅鼻，所以先有呢個名。呢種魚通常都會切薄片，用嚟加香料香煎，又或者焗，食落都幾香口。
$25/100克
銷售點：GreatFoodHall（金鐘太古廣場LG1）