噚日阿松、馬仔上立法會為「仙股事件」解畫，晚上八方在文化界國慶酒會見到李鵬飛，問佢點睇。一講起呢件事，飛哥第一時間大叫「完啦！」佢唔係話馬仔玩完，而係希望件事盡快完結，因為政府因為此事已經好傷，飛哥好感性咁歎氣：「大家唔好再喺傷口上灑鹽啦！」不過飛哥覺得呢件事早發生好過遲，遲啲爆煲就要人頭落地。咁又係，到時唔再係新丁，出事就唔係輕輕一句「對唔住」搞得掂。
飛哥講到馬仔道歉，淨係選擇性叫電子傳媒去採訪，情緒反而重㷫過八方，可能飛哥𠵱家都算係半個傳媒人，所以感同身受。佢話如果係馬仔自己嘅決定，就係佢嘅新聞官失職，冇提醒馬仔唔可以咁做；如果係有人叫佢咁做，就分明係嗰個人想「跣佢一鑊」！八方反而想知呢個幕後黑手係邊個。
傳真︰2623-9278
電郵︰