港股噚日險守於9500，全日跌145點，收報9505，成交60億元。市場憂慮美股進一步下挫，加上對電訊企業存有戒心，因此唔少外資大行力沽電訊股減磅。電盈（008）噚日一度跌至1.08元，跌幅達9.2%，收報1.14元，跌幅收窄至4.2%，成交達1.479億元，市值跌至250億元。對大市有舉足輕重嘅和黃（013）亦遭拋售，急挫4.8%，成交增至7.98億元。霍大班近排身體力行支持和黃，但股價愈買愈跌，唔通連佢都要坐艇？
雖然盈富基金（2800）最新一季賣多60億元就取消現行發售機制，其實係一大利好消息，但黑客認為今次芬佬力沽，絕對唔係因為吼住盈富出籠，而係因為對港股前景睇淡，以及港股之成交已不及以前活躍，投資風險相應增加，所以唔少外資都想減持港股。長此下去，本港國際金融中心地位會有所動搖。
歐亞（932）經過近日反彈後，噚日又再開始插水，全日大跌20%，跌至0.66元收市，成交增至5157萬元。Cookie話，早前此股反彈，因為幕後人士力頂，但歐資芬佬繼續沽貨減磅，再大嘅棚架都頂唔順啦。聽講噚日又有一個中小型基金沽貨洗倉。
大陶精密（8041）復牌後再升27.4%，收報0.172元，成交就唔算好多，只得509萬元。公司話正與國內獨立第三者磋商光纖元件製造合營項目，表面睇嚟冇咩特別，但幕後人士話公司可能藉此泊上大碼頭，應該有好戲跟尾，大家不妨密切注意事態發展。不過，將股價踢上去嘅目的，可能都係離不開抽水活動。
阿 虎