上個月小初提過生命科技（1180）因有人坐艇，喺度哇哇嘈，所以隻股唔易炒上。點知話口未完，原來有人終於頂唔順，情願要錢唔要貨，搞到隻股近排走勢一浪低於一浪。
噚日臨收市，隻股雖然有人企圖力挽狂瀾，搭個棚出嚟力頂，但經紀陳話，以佢嘅專業判斷，隻股跌勢已成，睇怕短期都唔慌會望見家鄉。
生命科技在數月前，曾經透過一間台資行先舊後新配股，以每股29仙，配售2.3億股出街。當時生物科技概念仍然Sell得吓，而隻股單天保至尊賣嘅肝藥，據聞又真係幾掂，所以當時真引到唔少人接貨。可惜時不予我，隻股之後表現如何，大家都有目共睹，就算上個月公司大鑼大鼓，帶一大班人上山東咁遠睇廠，股價都未見起色，終於有人按捺不住，沽貨套現。
噚日隻股最低見過11.8仙，收13.9仙。若投資者喺29仙接貨嘅話，現時真係輸到喊得一句句。
慕容小初