名牌MarcJacobs前晚喺中環搞party，城中班「蒲精」幾乎全部出動，但最精采莫過於周立璟嘅現任女友AnaR.，以及前緋聞女友Danielle同場出現。
周立璟同AnaR.到場嘅時候，已經手拖手好鬼煙靭，馮仁昭好奇問周立璟，之前佢前度女友張惠妹（阿妹）喺武漢撞車受傷，佢全程陪伴左右，唔通唔驚AnaR.呷醋？周立璟好理直氣壯咁話：「唔怕，佢知我都係做嘢啫。」
阿妹受傷之後，竟然有人傳佢同阿妹復合，周立璟即刻耍手擰頭否認，話根本冇啲咁嘅事。老實講，周立璟又唔係超級靚仔，但點解咁多女仔咁冧佢？好似前晚AnaR.唔單止黐到佢實一實，佢哋坐車離開嗰陣，佢重好肉緊咁搓周立璟大髀，搓到咬牙切齒。
而在場嘅Danielle都唔執輸，同樂基兒玩到好鬼high，唔通唔抵得周立璟同佢女友咁好？
至於阿妹噚日就喺台灣會歌迷，戴住頸箍同班fans傾偈。
是非多多嘅麻煩女歌星同男友分開，其實唔會令人覺得意外，因為佢同某娛樂公司老闆行得咁埋，又得到特別照顧，佢男友聽到咁多閒言閒語，你話點忍呢！不過，馮仁昭覺得嗰個老闆嘅人品就唔錯，但做生意就唔多精明，好似佢嘅經理人部門就有幾個話事人，點解會咁？皆因每個高層都要擺自己啲心腹落去！個老闆搞娛樂事業係好有熱誠，但經驗就不足啦！好似之前佢收購咗一間公司，話事權又冇，點會做咁笨嘅生意㗎！
名模Rosemary噚日喺尖沙嘴美麗華酒店行婚紗show。有報道話安雅自從搖頭丸事件後，好多朋友都疏遠佢，其中就包括Rosemary。Rosemary噚日解釋話：「𠵱家對安雅嚟講係一個好困難嘅階段，但我同佢仍然係朋友，不過我諗就唔係好方便見面住，因為佢一出街都會有好多狗仔隊跟住佢嘅。」
超人女星對啲有錢中坑不嬲情有獨鍾，啲中坑係乜嘢樣都唔緊要，至緊要係荷包有水。當年佢重係卜卜脆嗰陣，已經跟中坑做情婦，估唔到𠵱家佢重係死性不改。佢𠵱家個有錢男友大佢成十幾年，超人女星雖則泊咗呢個碼頭幾年，但佢又唔想為一棵樹放棄成個森林，所以佢不時同人講大話，話同男友已經分咗手，重猛打電話畀男友身邊嘅富豪朋友，叫人哋出嚟陪佢，不過啲富豪都知超人女星係乜嘢人，所以個個都唔理佢。
呢個禮拜六就係中秋佳節，張智霖（Chilam）同女友袁詠儀（靚靚）噚日好有心咁，拎住兩袋月餅去探羅文。Chilam同靚靚一齊拍拖去咗羅文跑馬地嘅寓所，佢哋冒住雨都去探前輩，真係唔話得。而羅文嘅前助手Terry就拎住袋乾洗衫出現，Terry話羅文又食得又瞓得，身體幾好！
新城DJ啤梨（葉文輝）噚日到沙田新城市廣場舉行「啤梨好心好Fun簽名會」，又即場為歌曲《好心分手》選出MV女主角，吸引咗過千人圍觀。大會之前已經派咗二百個籌，但有啲fans出蠱惑，利用彩色影印整假飛，搞到個簽名會即時多咗幾百人到場。雖然fans出蠱惑，但啤梨反而覺得佢哋好犀利，所以為咗滿足佢哋，啤梨話會盡量為每個fans簽名。