香港興業為海澄湖畔二段搞嘅嘉年華會，昨日因天雨關係移入售樓處內舉行。另外又出動多部旅遊巴士，喺荃灣、旺角、尖沙嘴、中環、鰂魚涌等地接載準買家，途中更在車內廣播愉景灣環境及屋苑設施。又喺客人參觀示範單位後，安排服務員上車道謝，招呼周到。重特別提醒大家，將會途經集團嘅東涌藍天海岸，年尾就可以賣，蘭西喺架車度，重以為自己參加咗睇樓旅行團！
另外，蘭西先前提到，香港興業買咗新世界上環信德中心招商局大廈23樓，原來重買埋22樓，但賣方聽講係信德集團。
市場人士講，香港興業一年前已經開始搵寫字樓，但條件要有三萬呎，間隔四正，當然價錢要平啦，好幾間代理行都試過做呢個盤，最後單交易直接成交。
據聞信德中心22樓，信德一直都係放租唔肯賣。聽講香港興業買嚟自用，將佢哋喺港島區分散嘅寫字樓集中。
長實趙國雄噚日專登為凱帆軒撬居屋客一事解畫，蘭西盡量將原話引述：居屋客買私人樓，一方面可以提升居住水平，同時可以騰空居屋單位，等更有需要人士購買。呢個係chaineffect，本來係好事，點解講到我哋好似針對性搶客呢？其實，應該由積極方向去諗，社會有好多低下階層仍然需要買居屋，有能力嘅居屋客轉買市區海景優質私樓，就可以騰空番啲居屋單位出嚟。成件事只係想幫助市民提升居住質素，點解講到我哋好似十惡不赦呢？其實，愈多人住居屋或公屋，只係代表個社會生活水平唔夠好，住私人樓，則代表生活水平有所提升。我哋都唔係專登搶居屋客，只係為咗提升市民居住水平……
（版位有限，下刪逾半小時說話）
小欖愛琴海岸收票速度同氣勢，明顯唔及小島新盤咁強勁，計埋過去兩日，代理估計只有約2200票，更有部份代理行已經安排人手，轉戰深井碧堤半島。
新地雖然用到跳bar方式，最高2.5%佣金利誘代理，但係個市七國咁亂，度度都有新盤開，搞到班經紀好似冇晒方向。蘭西重聽聞有代理私底下開咗個賭局，估個盤跳唔跳到bar，聽講好多都買唔得。唔知新地知道咗，會唔會激到生蝦咁跳？
住宅樓愈高愈值錢，廠廈就要樓底高先矜貴，即使現時廠廈樓面供應多，空置率高，樓底近15呎嘅工廈單位亦唔憂租。
美聯物業工商部營業經理陳偉志話，唔少公司都會指定搵呢類單位，貪佢存貨量大，可以多擺幾件貨，所以呢類單位呎租閒閒地高過普通單位25%，好似柴灣工業城，低層單位樓底有15呎，呎租4至5蚊，比上面樓底得12呎嘅樓層，呎租只係3到4蚊，最少高25%。
地產代理𠵱家連做工商物業，都要跟埋住宅嗰種玩法，要貼錢做宣傳，真係「未見官先打八十大板」。
有代理對蘭西講，為咗要攞工商物業嘅獨家代理招標權，好似印單張、掛海報等一切費用都係由代理畀錢，最少一萬，至於銀主盤就分分鐘冇幾萬銀都找唔到廣告費。所以代理會揀啲賣出機會大嘅盤至接，唔係就真係白做兼蝕入肉。不過，因為係獨家盤，好多時廣告出街後都有買家問盤。
田氏化工老細田家炳，7月斥資逾1億元，購入屯門力善多元化工業城，正策劃改為集教育文化及娛樂的中心。該廈樓高25層，總樓面約141萬方呎。田家炳基金會發言人話，上址將預留樓面讓大學開設副學士課程，另有青少年中心、書城及餐廳，短期將向城規會申請。
據了解，該廈將是首個由工廈改為學校嘅個案，其他廠廈業主都想借鏡。現時香港約有10間學校以田家炳命名，國內更多。
蘭西
電郵地址：