馬會總裁黃至剛幫港台做《與CEO對話》節目，話會以「法、理、情」管理馬會，引起馬迷關注。八方昨午在沙田會所飲茶，聽到唔少趣聞，有資深馬迷話，未來一年，馬會管治文化一定會變，黃總裁都要面對新人事新作風。
資深馬迷話，過去馬會管理大權，掌於主席及總裁手中，董事會十足花瓶一樣，但季中發生幾件事，令班董事忍無可忍；例如六環彩派錯彩事件，計漏多寶彩金已經夠蝦碌，但班董事竟然要睇報紙先知；又如大加會費，原來在董事會討論中，加費議案不獲支持，但唔知點解，最後照加可也，重話「知會咗董事會」，真係唔嬲就假。
所以大家都寄望夏叔（夏佳理）出任新主席之後，能夠撥亂反正；是故上月尾選董事，好多稀客都親自到場，投票率罕有咁高。
八方好奇，問佢近來咁多馬會相關新聞，諸如人家屋企用一百吋大電視螢幕都有人講，係咪有啟示呢？資深馬迷就話，此等事應該同董事無關，相信係選舉期間有人放風，又或者選舉之後，有人不滿，向傳媒爆料；馬會要整頓，唔需要用呢種手段。
傳真︰2623-9278
電郵︰