上個禮拜六深夜諗住睇吓西甲好波，點知好波睇唔到之餘，重睇住貝迪斯唔能夠響極佳形勢之下打敗皇馬，真係戥佢哋以及捧貝迪斯嘅賭友唔抵囉！
開波前已經搞咗接近二十分鐘，後來雖然都開得成波，不過啲燈光就重係有問題，個球場時光時暗咁。可能係呢個原因，搞到連踢緊嗰班皇馬球員都冇乜心機，結果重畀貝迪斯嘅卡比𡁻入一粒。
我求大俠睇到貝迪斯個勢咁勁，真係覺得呢場波皇馬輸梗九成，點知完半場前又突然全場漆黑一片，結果場波重腰斬埋，今場表現同名氣唔成正比嘅皇馬，就此逃過一劫。
至於呢啲咁嘅熄燈事件，自不然會令人聯想到係咪打假波呢？呢層我求大俠就唔知嘞，不過捧貝迪斯下盤嘅賭友就真係唔抵囉。
輸埋畀列斯之後，曼聯似乎重未行完衰運喎。光頭佬門將巴夫斯就被懷疑將個膠水樽踢向列斯球迷，喺賽後被當地警方邀請協助調查；雲尼斯達羅就繼續冇表現，重俾荷蘭國家隊教練艾禾卡特警告可能會棄用；碧咸又可能因起踭打保耶而被罰；畢特重響今場傷出令兵源買少見少，唔知「紅魔鬼」使唔使拜吓神轉吓運咁呢？
講起雲尼斯達羅，最近佢除咗冇乜表現之外，響球場外重要「破財」㖭！話說荷蘭職業球員總會，會喺荷蘭球員嘅人工、轉會費等收入扣起部份用作投資，情況相信好似我哋香港人嘅強積金咁。點知最近份投資報告出咗，淨係雲尼斯達羅、伯金、雲達沙三個夾埋嗰份就有成千五萬鎊，但已經唔見咗一截，真係所託非人嘞！
俄羅斯大美人古妮高娃「紆尊降貴」，嚟到上海參加「蚊型」比賽，無非都係想打破自己職業生涯嘅女單錦標荒啫！諗住佢喺決賽嘅對手以色列莎舒露娃，之前又兩次輸過畀佢，睇怕今次冇走雞啦，點知到最後古妮嘅擁躉都要失望，真係唔知呢啲叫係宿命難違，定係輸心理緊張呢！
中國男籃兩大中鋒姚明同王治郅嘅女友，原來喺江蘇打緊世界女籃錦標賽。據我求大俠收到嘅料，姚明女朋友名叫葉莉，芳齡二十一歲，係中國女籃前鋒；而「郅哥」嘅女朋就係十號妹隋菲菲。其實兩姝都有啲同病相憐，「郅哥」最近玩完失蹤後又唔肯回國，姚明遲啲又要過NBA搵食，兩姝都要飽受愛侶兩地分隔嘅相思之苦。