上禮拜五，杜指唔得，標普同納指冇事。港股上禮拜好過一陣，去到禮拜五又再散過，9600兩個月內第4次受到考驗，如果美股繼續唔生性，恒指見9400、9200甚至9000都咪話冇可能。
𠵱家最好乜都唔做住，等機會。如大市有機會技術性反彈，則趁高做淡，即係到時搵啲Put輪揸吓。如大市殘多一殘，到咗更超賣地步，則趁低博技術性反彈，即係搵啲Call輪揸吓。
無論喺大市升後揸Put輪或者大市跌後揸Call輪，策略都係短炒，大市變化好快，唔係長情時候。
大市如果升番三二百點，可以揸啲恒指Put輪或者藍籌Put輪，對象有滙豐（005）、長實（001）、和黃（013）、新地（016）、中移動（941）等嘅Put輪，揀有成交嘅埋手。
相反，大市如果跌三二百點，則揸恒指Call輪或者藍籌Call輪，對象亦係有較大成交者。
中銀（2388）一向比較郁動得少，上禮拜五收8.20元。大市唔掂，中銀亦難逃一跌，不過幅度唔會太大，而且有機會彈番上去。睇住中銀，若忽然跌低過8元，博些少Call輪9462，明年7月到期，數據唔曳，現價13.5仙，吼住12仙上車。
章盛