家陣經濟確係差得緊要，唔少商戶都係但求去貨，夠交租就算，可見經營環境愈嚟愈惡劣。好似今次呢個電器開倉，平均件件貨都係半價發售，最平更低至三折，全部旨在去貨。當中大部份電器都主打實用，由電視機、充電器以至太陽能收音機，都盡量以實用、慳錢為原則，最啱逆境中想慳番一筆嘅朋友。
記者：張穎倫 攝影：陳盛臣
ImageGirl：Kay
如果你想慳錢兼慳地方，2合1電器產品就一定啱你心水。好似呢部21吋電視加DVD二合一，唔單止價錢平過分開兩部機購買，DVD方面更可以一口氣播足3碟，可以睇足成日，啱晒懶人慳埋換碟嘅時間。最抵讚係佢已經有埋“ScreenOff”同“PBC”呢兩個常用掣喺機身，唔單止方便聽歌時更慳電，更唔使次次搵遙控器咁麻煩。
型號：aiwaVX-F21DV5
體積：W22×H19.5×D20吋
貨量：6
街價：$4,500
開倉價：$2,900
若然你係對品質有要求嘅用家，呢部愛華微型Hi-Fi就係必買之選，皆因佢採用木製喇叭之餘，更打明日本製造，今時今日確係罕見。最正係佢有埋3CD、3MD功能，要自己錄精選碟，定輪流6碟播放都全由你話事。其他功能，好似收音機、錄音帶同愛華至威嘅QSurround同BBE當然有齊，小記試過，低音方面都夠力水，適合聽快歌嘅朋友。
型號：aiwaXR-MD710
體積：W20×H11.3×D13.5吋
貨量：6
街價：$1,980
開倉價：$1,380
喜歡慳電同環保嘅朋友就最啱使，事關呢部收音機可以全由太陽能發動，完全唔使用電。當無太陽嘅時候都唔使愁，因為可以利用佢嘅手攪發動裝置作為後備電源，只要攪50圈就可以足夠聽30分鐘，非常好用。小記試過接收非常清晰，有齊FM同AM，絕對抵玩。
型號：Freeplay太陽能收音機
體積：W11×H8×D6吋
貨量：50
街價：$380
開倉價：$108
近排天氣冇咁悶熱，開始有啲秋意，小朋友、老人家可能想飲番杯熱水，不妨買個電熱水瓶畀佢哋用。呢個氣壓式電熱水壺有3.2L容量，一家三口都夠飲。而且佢更有埋自動截斷電源設計，防止過熱或者乾水引起嘅危險，又有埋翻滾功能，隨時隨地有熱水飲。
型號：威馬GHP-32B
貨量：12
街價：$480
開倉價：$288
一般電動牙刷都唔可以調校刷頭旋轉角度，未必符合不同需要，但係呢支由瑞士製造嘅電動牙刷，就設有40度同70度兩個旋轉角度選擇。普通人就適合用70度刷牙，覆蓋面大刷得夠快，但有牙肉敏感問題嘅朋友，就可以用40度慢慢刷保護牙肉。再加埋世界電壓，去到邊都用得。
型號：GRUNDIG1365SL
貨量：15
街價：$300
開倉價：$88
小朋友可能好拍採耳，一方面木製同金屬製嘅採耳器可能太過堅硬，好容易刮傷小朋友幼嫩嘅皮膚，而且小朋友耳洞又細又狹窄，媽咪未必睇得清楚，整痛小朋友。唔想嚇親佢哋的話，呢個HelloKitty發光採耳器最啱使，事關佢採用軟膠設計，唔會太硬。另一方面，採耳器前端亦有發光設計，確保媽咪睇清睇楚，唔會整親小朋友。
型號：HelloKitty發光採耳器
貨量：200
街價：$180
開倉價：$39
相信你都有用過大大部嘅熨斗，燙衫時笨拙唔方便。所以呢個蒸氣熨斗，就主打體積輕巧，燙衫鈕位同骨位，都可以隨時轉方向，夠晒易用！功能方面，亦有齊乾燙、蒸氣同噴水三個功能，再加埋1200W嘅熱力，面對各種衣物都燙得得心應手。
型號：捷家伴EXS-1
貨量：20
街價：$250
開倉價：$70
玩開數碼相機同遙控車嘅朋友，都知道萬能量嘅充電夠晒耐用，平時買4粒AA電都要成嚿水，今次$108有電之餘，更有埋快速充電機，的確平到笑。充電機可充齊AA、AAA、C、D同9V各種電池，一次過可充4粒AA再加2粒9V，只需5個鐘就叉滿，又識自動Cut電，相當安全。
型號：萬能量CH4-B
貨量：30
街價：$250
開倉價：$108
𠵱家唔單止睇戲會用超低音，連打On-LineGame都好興駁多幾個喇叭先夠震撼。講到價錢相信都冇邊部平得過佢，由做開收音機嘅Venturer負責製造，外殼用上木箱設計，絕非一般膠殼可比。輸出方面，亦有10W、8ohms，力水都算唔錯，抵玩過鴨記出品。
型號：VentuverCD2680
體積：W7×H12.5×D9.5吋
貨量：20
街價：$200
開倉價：$70
嘉宏貿易電器開倉
地址：旺角彌敦道749號歐亞銀行大廈11字樓C室（太子地鐵站C1出口）
開倉日期：即日起至9月30日
營業時間：星期一至五：9:30am-7:00pm
星期六：9:30am-5:00pm
星期日休息
查詢電話：27700668