如果大家有睇開《車天車地》版的話，早前我哋已經披露過瑞典富豪車廠，會推出全新一代CitySUV嘅XC90，而亞Mark重話過呢款新車，既有齊同級獨有嘅七座位設計，當中2.5Turbo版預售價不過45萬，而頂級3.0TwinTurbo版亦不過55萬，要較同級平治M-Class及寶馬X5便宜一截之餘，最近我哋嘅特派記者，重獲邀成為唯一本地報章嘅汽車傳媒，跟一眾有份量汽車刊物嘅記者，前赴瑞士實地測試全新XC90車系㖭！亞Mark曾跟他電話聯絡，聽講話呢款新一代CitySUV，響本地傳媒心目中有上佳評價，既貫徹有富豪汽車嘅安全性，而且重有不俗嘅操控同性能演繹，究竟部車有幾正？大家就要留意我哋嘅報道喇！
亞Mark話多個消息畀大家知，就係遲吓富豪香港代理會將香港嘅陳列室，由銅鑼灣搬去灣仔告士打道，勝在係車行集中地，而新舖位置重喺正林寶堅尼同埋凌志陳列室之間，除可容納更多新車外，櫥窗嘅矚目性重要較前高出幾倍㖭！屆時新陳列室開張之時，或許會係XC90到港嘅佳期都唔定㗎！