雖然近排個市靜到連隻蚊飛過都聽到，但小初在賓架老友中，聽到好多古靈精怪嘅古仔，繼上次有個賓架話大凌（211）可能放盤後，上周有位年輕新進賓架同小初講，科建集團（563）近日傳出放盤。
小初聽完覺得奇怪，皆因科建好似今年4月底先至股權易手，原本班中資大股東，以2千餘萬元，將3成唔夠嘅股權賣咗畀現時嘅大股東，當時股價曾抽高過一陣，冇理由事隔唔夠半年又再賣盤，唔通殼股真係有得炒？
年輕賓架話，其實科建日前發咗個通告，話要延遲公布業績，就已經暗露玄機，聽講間公司盤數原來唔易睇。科建上手大股東，用成5千餘萬元向禹銘（666）買隻殼返嚟，之後只搞過一次供股。至於佢點解肯以2千餘萬元，賣畀𠵱家嘅大股東？中間嘅原因則唔方便講。
科建放盤呢件事流傳後，股價就由谷底反彈，由5至6仙水平抽返上10仙附近。
慕容小初