《茶杯》出咗一本《I岸W海》，售價五十元二百五十幾頁，主力介紹上海飲食地方、靚酒店、蒲點、博物館、手工藝，可說包羅萬有，睇完心郁郁，想去上海一行。
中貿林在上海置有居所，對上海地產及各方面都知之甚詳，《茶杯》本書介紹啲地方，佢都去過好多間。
左丁山問佢投資上海地產有冇得諗，佢話：「你不如去聽吓一個『上海房地產專業論壇』，聽啲專家講完，再跟我到上海實地視察。」
呢個名為「投資上海、投資未來」嘅房地產專業論壇，喺九月二十日星期五上午九點到下午四點半舉行，地點係會展中心六○三室。
有乜人講嘢呀？講者多數來自上海，譬如講上海市規劃、上海房地產市場分析，就由上海專家講，至於上海房地產市場經驗討論，就由外資發展商及內地發展商發言。由朝早講到下午，有啲睇頭，對投資上海房地產嘅，可以報名參加（電話：3105-2055）。不過咁噃，專家講嘢畀你聽，要收入場費嘅，票價係二千三百四十元，貴唔貴？見仁見智咯，真係想學嘢，去買樓買地嘅，二千零蚊，濕濕碎啫；想去瞌眼瞓之人，就冇謂浪費。
左丁山去唔去？逢係朝早講到下晝嘅研討會，自己都冇法子抽到時間，想去都唔得，就算免費都恕難出席，最鍾意參加嘅，只係午餐演講會，趁食飯時間聽番啲資訊或分析。