由TypeRClub舉辦、並為中國運動員基金籌得十多萬善款嘅珠海汽車同樂日，剛於上星期六假珠海國際賽車場舉行，當日場內有多部跑車現身，令在場觀眾目不暇給，不過最吸引都係呢部雷諾ClioCup原裝廠車喇。據來自歐洲嘅數據顯示，此車馬力輸出約230匹，可用以參加GroupA賽事。不如𠵱家一齊嚟睇睇，呢部戰車有幾正啦。
雖然呢部戰車可參加GroupA賽事，但其制動系統僅用上原裝部件，只改換上高性能煞車碟同迫力皮，但眼見此車的制動性能一啲都無腳軟嘅情況出現，往往喺彎前好遲先煞車，表現十分出色；有如此表現除拜車身輕所賜外，同時亦能表現出原裝制動嘅高性能效果。
此車引擎用上四直噴生氣系統，並無裝設風隔，只係喺入風筒上加有鐵絲網，再於車頭開出導風孔，直接將生風導入引擎內；而引擎中缸及盤頭都經過RenaultSport改裝，同時亦用上由佢哋所生產嘅半自動波箱，轉波速度比傳統手波快一倍，加上車架部份被偷輕，因而就算只有230匹馬力輸出，都可以創出不俗嘅圈速紀錄啦。