四驅Jeep熱潮近年大不如前，有說係因為保費昂貴，其實咁講法唔多正確，保險費貴其實只限幾款偷車機會率較高嘅中上價款式，而以往極流行嘅輕型Jeep如鈴木Vitara、豐田Rav4及本田CR-V等等，保費其實一啲都唔貴，甚至乎連Loading都唔使加㖭。
少咗人買Jeep其實係同大家想慳錢有關，以往大家出手闊綽，買Jeep仔可以大改特改，但求與眾不同；不過家陣買車嘅用家就實際好多，講求慳油實用。因此1300cc車仔同十幾萬嘅七人車最多人諗。正因為需求下降，以往係細Jeep名牌嘅豐田Rav4，目前市價十分吸引；最早期嘅三門短陣版，1995年車二手叫價約4萬5千元左右、1996年三門版約值5萬5千元，五門型號約6萬7千元、1997年嘅三門及五門分別約6萬8千及8萬2千元成交，1998年嘅開篷版則可賣至9萬元左右。
二手Rav4手波及自動波都有，上述價格係自動波嘅參考價，由於Rav4用家多數喺市區用，唔會作越野用途，所以手波型號需求有限，二手價亦比自動波低一成或以上；以同年份計算，實用性較高嘅五門型號，一般貴三門型號約一萬至萬五蚊。近期1995及1996年嘅二手盤價格下調，原因係1995年車今年開始要先驗車才可續牌，明年就輪到1996車年年驗。
Rav4易手盤質素較參差，由地盤用車到內外打理如新嘅放盤都有，6年車牌簿手數3字之內屬可接受；另外由於市場供應量不少，買家宜耐心物色優質靚盤，如遇車身改裝料較多嘅放盤，只要裝工妥善，便屬於增值項目，值得買入。不過部份大量改裝嘅放盤，選購前必須睇睇懸掛、制動等機械部份，同時若車底水泥迹特別頑固者，更有可能係地盤用車或經常跑爛路用，呢類粗用盤不買為妙。