李麗珍過去鍾愛黑色服裝，但近年心態轉變，開始把自己打扮得色彩繽紛一點，倍覺朝氣。珍妹並表示抗拒作性感打扮，因怕自己成為焦點而渾身不自在，T恤配牛仔褲才是最舒服，這樣的打扮亦才是真正的「李麗珍」。
李麗珍（珍妹）一向的衣着打扮都以深色為主調，尤以黑色為甚，她說：「我鍾意着黑色衫好多年，對黑色有一份情意結，不過近年開始覺得着黑色衫好悶，過份單調。以前會希望形象成熟啲，成日着高跟鞋，𠵱家心態變咗，開始鍾意着一啲顏色豐富嘅衫，好似綠色、橙色，自從着多咗鮮色衫，個人都變得有朝氣咗。」
珍妹笑言十分渴望擁有模特兒的骨架，她說：「因為擁有高瘦嘅骨架，着衫都會有型啲，可惜東方女仔始終個子唔高，着衫無形中會多咗限制，好多時唔可以太花巧。」
平時的珍妹喜愛以簡約舒適的打扮示人，她說：「因為自己嘅職業係演員，好多時你哋見到嘅係我戲中嘅造型，真正嘅我鍾意舒服、順眼同簡單，平時唔使工作，都鍾意着T恤牛仔褲，基本上我成世人都係鍾意呢種打扮，唔會刻意dressup，唔需要開工時，喺街見到我亦只不過係一個普通人，啲人唔認得我就最好，可以做番自己。」
珍妹認為自己屬於有型格多過性感，她說：「我都幾抗拒作性感打扮，可以揀絕對唔會揀咁少布，對我嚟講性感打扮好辛苦，個個人會以我為焦點，咁多人望住晒實在太辛苦，會渾身唔自在。」
對於名牌，珍妹表示不會盲目追捧，她說：「我唔會特登『一窩蜂』去買啲大熱嘅牌子，好似𠵱家好hit嘅DriesVanNoten、TsumoriChisato，當年香港重未有人識時，我已經着。加上近年好鍾意玩mix&match，所以唔會淨係買一個品牌，就算買名牌，都唔會買嗰季嘅signaturepiece，因為會好容易撞衫。」
至於今季珍妹的mustbuyitems，她表示會買多啲燈芯絨和格仔圖案的服裝。她說：「我好鍾意呢一類帶有英倫同日本風格嘅衫，好似imaroon呢個秋冬系列就幾適合我，因為充滿英倫味道，簡單舒服，同我嘅風格好配合。」
採訪：RitaLeung
攝影：MatthewLam
髮型：JackyMaofHeadquarters
服裝：imaroon
場地：中環HAiR