徐濠縈前晚去金鐘太古廣場間Joyce睇時裝表演。問徐濠縈會唔會順便幫男友陳奕迅（Eason）買新衫？佢話：「唔會啦，Eason都唔鍾意着名牌嘅，佢平時着啲板仔衫都係二、三百蚊件㗎咋。不過佢絕對唔係一個孤寒嘅人，佢對佢錫嘅人就會好闊佬，好似有年我生日，佢就送咗隻成五萬蚊嘅卡地亞戒指畀我，亦試過買副成五千蚊嘅ChromeHeart太陽眼鏡畀B哥哥（鍾鎮濤）同霆鋒。」
對於早前楊千嬅大爆佢同Eason已經結咗婚，徐濠縈就話：「我諗你哋誤會咗佢意思，我啲朋友不嬲都叫我『阿嫂』㗎啦，我信得過千嬅份人，佢絕對唔係有心講嘅。而佢話同我唔係朋友，我諗大家對朋友嘅定義唔同囉，我呢啲叫聲『Hi』就已經當對方係朋友，可能千嬅要同一個人再熟啲先至叫朋友啦。」
梁朝偉（偉仔）前晚喺《無間道》慶功宴時提早離場，佢當時㩒住心口走，搞到個個記者都以為佢唔舒服。澤東嘅工作人員噚日解釋，偉仔當日確實係有啲唔舒服，但㩒住心口就冇特別原因。
重有，偉仔呢排戴住條紅色水晶手鏈，據知呢條水晶手鏈對愛情運有幫助，唔知偉仔戴住條鏈，係想幫佢同劉嘉玲定係張曼玉嘅愛情運呢？
韓君婷同王合喜噚日喺電視城，為新節目《大學群英越野狂奔》拜神。韓君婷同王合喜將會聯同十位大學畢業生，遠赴澳洲昆士蘭進行多項競技挑戰，噚日無綫更安排關嘉美醫生為各參賽者進行身體檢查。
瘦身後嘅韓君婷噚日打扮密實，外套亦蓋過臀部，所以無法睇清楚佢係咪真係擺脫「籮霸」稱號，韓君婷話
過氣豔星復出拍戲，成日着住周身名牌同記者晒碼頭，但係佢啲錢點得嚟？唔使講大家都知。
其實好耐以前過氣豔星都去過汶萊，但係啲王室人員嫌佢皮膚唔夠白，所以冇要佢。𠵱家過氣豔星出番嚟，當然因為唔夠「銀彈」，想增加番啲知名度，搵番幾個好老細啦。
莫可欣噚日喺銅鑼灣一個名人帆船邀請賽中勇奪冠軍。佢話自己轉咗行做市場推廣後，個人開心咗好多，佢話諗番起喺TVB嗰五年，淨係等開工嘅日子都等咗三年，際遇同之前大鬧《星光熠熠耀保良》嘅李文彪有啲相似。
莫可欣噚日話：「我都有勸啲想入行嘅朋友，之前真係要考慮清楚，唔好浪費時間呀。」
𠵱家好多女星做減肥食品或者纖體中心嘅代言人，但究竟係咪隻隻牌子嘅食品或者減肥公司都咁有效，相信大家心裏有數。好似最近馮仁昭八到單料，有位做咗纖體代言人嘅電視台阿姐，竟然喺第二間度做纖體療程，因為佢試過自己代言嗰間減得唔好，所以喺朋友介紹下，去咗另一間做，不過嗰位阿姐每次去親另一間減肥中心，都去得好鬼鼠，驚俾人踢爆喎。
早排有個音樂比賽，搵咗大笑姑婆女歌手做嘉賓。點知班參賽者跳舞綵排嗰陣，大笑姑婆竟然一邊睇一邊笑到捧住個肚，跟住同身邊助手喺度指指點點，擺明喺度笑班參賽者跳得唔好。
班參賽者返到後台之後，先至發覺個個幾乎俾佢笑勻，重覺得大笑姑婆好乞人憎，結果你一言我一語狂數大笑姑婆，好似暴動咁墟冚。
鄭少秋（秋官）噚日喺電視城化妝間化妝，佢隻左手帶住幾串佛珠，原來呢幾串佛珠係老婆官晶華送嘅，秋官話其實好多影迷都好照顧佢，有時都會求啲符畀佢保平安，早前盂蘭節，佢喺荒山野嶺拍外景時，見到地下好多金塔，佢都會講「唔該借歪」，以防萬一喎！