星期三掛上八號風球，實非始料所及，因為是日在中環唔覺有雨落，在街上行亦唔覺點樣大風，點知狂風一吹，機利文街啲棚架就跌晒落嚟，實在令人驚異。
既然天有不測之風雲，馬主惟有大嘆冇運。夜馬取消之後，馬迷自然感到無癮，馬會亦損失唔少，過往無論風風雨雨，馬會總係鴻福齊天，跑完馬先至天氣轉壞，或者天氣能夠及時轉好，等賽事可以如期舉行。今年唔知係唔係風水改變咗，馬會的運氣好麻麻。
但最最冇癮嘅，相信係諗住實贏馬嘅馬主。吳嵩自己養馬幾年，「優點」、「有心得」、「富有心得」三隻屢入位置，總係贏唔到頭馬：上季隻「有心得」俾蔡神仙操到火紅火綠，騎師戴勝喺沙圈講：「隻馬從來冇咁弗！」諗住贏梗啦，點知跑跑吓流鼻血，跑第四；今季隻「富有心得」仍然留在姚本輝馬房，八月已經頻頻快操、拍跳，趁評分重有着數，要贏番一場。上季「富有心得」跑快活谷短途，三次都因為排位不佳（排外檔）而飲恨，只能跑入位置，星期三夜馬，竟然抽到第一場一號一檔，狀態弗到漏油，路程啱晒對手弱，騎師馬偉昌鬥志如虹，所以吳嵩叫齊老友去捧場，準備拉頭馬影相，論隔夜賠率熱到得一點七倍。雖然熱到乏味，左丁山亦準備入場吶喊助威恭喜吳嵩，點知賽事取消！大家當堂冇晒癮，下一次，都唔知有乜對手，抽到乜嘢檔位，或者狀態能否保持。做馬主，想拉一次頭馬，其實好難㗎。