噚日個半鐘嘅「莎蓮娜之夜」，最有趣嘅一幕首選細威拍可以做得佢阿爺嘅何鴻燊對基拔拍港協會長霍震霆一幕。為了配合兩人較慢的步速，細威盡量將就慢慢放個波，可見佢都幾識敬老。
前日問極細威都唔肯講會着邊件「戰衣」出場，原來佢早有預謀，先係pinklady裝，重露出銀光閃閃嘅肚臍環。中場時學足明星開演唱會，離場換衫。「黑貓」裝一出令到全場球迷掌聲震耳，可見大部份人都幾受落佢件「黑貓」裝呢！
噚日莎蓮娜駕到，令幾近爆滿嘅維園網球場熱鬧非常。細威一向自視能同男球手睇齊，噚日「大騷」甫開始，賽會就安排兩名男球手（香港台維斯盃代表白米高及九四亞運金牌得主伊斯文）同佢對打，睇佢應付裕如，球迷當然睇得開心啦。
二十一歲嘅香港球手湯嘉寶，上個月嫁咗畀一個四十歲嘅商人王志錦。原來佢因為前陣子與丈夫不慎車禍，觸及右手神經舊患，所以成兩個幾月無掂波。為咗噚日對細威，佢特別練咗幾個鐘，表現都唔錯。