講真，小記一向怕貓，今次為了工作，鼓起畢生勇氣直闖西灣河，採訪一隻26吋腰圍的大肥貓。一踏入客廳，只見採訪目標攤在地上，對我和攝影師完全不感興趣，和主人Sherin談了十多分鐘，大肥貓依然一動也不動，心想今次份稿一定凍過水！好彩，原來大肥貓古怪行為多多，親眼目睹後，連怕貓的小記都不禁發出會心微笑，就等大肥貓自己話你知，佢嘅生活行為有幾古怪！
記者：區佩嫦
攝影：林栢鈞
我叫Mimi，係一隻短毛貓，今年已經11歲。由細到大都住喺加拿大，主人Sherin上年返香港，我先至移民嚟香港住。喺香港的確幾唔習慣，以前喺加拿大，間屋有三層樓，可以畀我走上走落運動吓，𠵱家住喺香港幾百呎地方，無得畀我周圍跑，搞到我肥到行路時個肚腩都差唔多掂到地！我比較怪，鍾意同狗玩，唔鍾意同貓玩，最大嗜好係食同埋瞓覺。
我同我嘅同屋小貓小Mi，一個月會食8.5磅嘅貓糧，不過大部份都係落入我個肚度。除咗食得多，我重瞓得多，每日會瞓成差不多二十個鐘，再加上我無乜運動，所以我嘅三圍數字係26、26、26，體重有成25磅半，絕對係水桶身形！不過獸醫話我健康正常，所以我都無諗過要減肥！
我唔係由細到大都咁肥㗎，我細細個住喺加拿大時，身形好標準，嗰時我不知冧到幾多貓女，不過我細細個已經畀主人攞咗去做絕育手術，所以幾靚嘅貓女我都無福消受，有時望住自己個肚腩，都幾懷念當時咁Fit嘅身形㗎！
身為肥貓嘅我，有一個連主人都覺得奇怪嘅習慣，就係一定要去浴缸飲水喉水，如果唔係浴缸，我就點都唔肯飲水，連主人都奈我唔何，乖乖幫我開水喉，等我豪飲一番。我每次起碼飲成三、四分鐘，然後出廳繼續歎世界。唔好以為我件頭大，跳高跳低一定論論盡盡，我每日跳出跳入飲水四、五次，次次都永無失手㗎！
由細到大，我都鍾意同主人Sherin大被同眠，不過我都有另類怪癖，就係鍾意瞓鞋盒！唔知點解對鞋盒會情有獨鍾，就算鞋盒唔夠大，我點都要瞓落去，結果搞到啲鞋盒爛晒，好彩主人都無鬧過我！
貓通常都比較自我和獨立，唔係好鍾意畀人掂，不過我就與別不同，好鍾意主人當我係枕頭。我好想畀主人知道我嘅感受，所以每次佢瞓落嚟，我都會不期然矇起雙眼露出一副冧樣！所以話，我真係與別不同，性格似狗多過似貓！
好多人都話我肥，唔好以為我唔識聽，有啲人重話我頭細身大，似着住一件動物衫嘅人㖭！每當有人摸住我個肚腩話我肥，我都會好嬲，我一發脾氣，就會匿入梳化底，乜都唔理，吹咩！
好多貓都唔鍾意梳毛，唔知點解我就最鍾意畀主人梳毛，每日Sherin返到屋企一拎起把梳，我就會乖乖咁瞓喺地下，等佢幫我梳靚靚。我最鍾意佢梳我個肚仔，我重會自動伸手伸腳調校角度等佢梳，所以話我都幾醒㗎！
我係小Mi，今年7歲，係Mimi嘅同屋，唔好睇我身形咁Fit，其實我係病貓一隻，聽醫生話我天生免疫系統有事，之前喺加拿大已經換咗兩次血，連醫生都話我無希望，要將我人道毀滅，好彩主人唔捨得，點都要醫番好我，𠵱家已經無乜大礙，不過就身患糖尿病，每日都要食兩次藥同打兩支針，有時都會感懷身世好抑鬱！
可能因為我身患頑疾，所以我特別錫Mimi，雖然平日佢唔係好睬我，但當佢唔開心搵人出氣時，佢點打點鬧，我只會走唔會還手。有時佢唔開心，我重會主動舐佢，等佢開心啲，連主人都話我性格純良友善。
我平日最鍾意就係睇電視，睇到啲精采嘅場面，我重會忍唔住用手拍部電視機㖭！有次拍拍下部電視突然無咗畫面，我即刻喵主人，幫我開番部電視，好彩主人知道我諗乜啫！
Mimi：
同佢相處咗9年，覺得佢嘅性格似狗多過似貓。以前喺加拿大時，佢每日都會在窗旁等我返屋企，只要一見我架車經過，佢就會飛奔至門口，等我入屋然後喺我腳旁挨嚟挨去。雖然睇住佢一年肥過一年，不過我都無諗過要佢減肥，佢鍾意食乜我基本上都會畀佢食！
小Mi：
我睇住佢出世，重親手幫佢剪臍帶，點知剪完後唔記得箝實條臍帶，搞到佢差啲流血不止而一命嗚呼。雖然佢身患頑疾，但我唔會放棄，一定要將佢嘅生命延續落去。
一隻貓過肥，一隻貓有病，所以選擇貓糧方面我會比較小心，𠵱家佢哋食緊希爾思嘅成貓去毛球乾量，食咗之後覺得佢哋嘅腸胃好咗，8.5lb約售$230，一般寵物店有售。每日我都會同佢哋梳毛，先以虱梳梳一次，再用鋼絲刷梳一次，售價方面，虱梳一般約售$60-$90；鋼絲刷約售$100。喺香港出售的短毛貓多以英國短毛貓為主，售價約由$6,000-$10,000不等。
每位飼養寵物的人，都會與寵物建立深厚的感情，你與寵物間可曾擁有一些難忘溫馨的經歷？有的話，歡迎連同寵物相片、簡述難忘溫馨事件及聯絡方法，寄香港將軍澳工業邨西駿盈街8號，《蘋果日報》副刊「與寵物的一段情收」，個案合適的話，本報會派記者採訪，將你和寵物的故事與廣大讀者分享。