上個禮拜三係911周年紀念，大多數投資者都唔敢郁手做嘢，不過唔講唔知，美國標普期貨周二當日無獨有偶以911點收市，好多人都話係巧合，但伏勝覺得肯定係有人做嘅，皆因市靜好辦事，不過呢次人為因素對個市影響唔係好大，所以冇需要進行調查咁話。
呢排個個都講企業管治，話啲上市公司管理層要潔身自愛，唔好為咗推高股價而犯例，搞到好多公司高層唔敢見咁多報界，佢地把口密不透風，怕被誤會提供內幕消息，無謂被證監「的」去飲咖啡。
不過聽講宜進利（304）喺下個禮拜會約班分析員出嚟食飯，主要應該係講番公司嘅前景同埋向班分析員取經，班行家話隻股仔嘅前景唔曳，好多隻差唔多價格水平嘅股份，喺過去幾年都無佢咁好業績，加埋隻股仔只有1.35倍PE，要炒番起一啲都唔難。據伏勝過去嘅觀察，一般股仔搵分析員食飯嘅時候，不妨留意吓。
早前俾班外資行唱淡嘅中國聯通（762），喺幾間外資行睇番好下，上個禮拜終於都叫做跑返上嚟。隻股喺上市之後可謂「劫難」重重，首先國內手機通話費減價戰，之後諗住整多件抵食夾大件嘅CDMA網絡，益吓班客之餘又可以搶番啲市場，點知推咗成年之後，股價重低過上市價。今次班外資之所以「射」番住隻股，完全談唔上係理由，話說係中國移動（941）同聯通未來嘅盈利預測都會因為競爭劇烈而下降，聯通下跌嘅幅度相對起中移動細，所以就建議沽941買番762。
伏勝諗極到諗唔明，如果明知兩間公司盈利都係要跌嘅話，點解重買佢哋嘅股票，唔通呢啲叫做蝕少當賺？
伏勝