馮仁昭前晚去紅館睇Twins嘅第一場演唱會，馮仁昭一入場，就以為自己記錯日子，點解咁多四、五歲嘅小朋友嘅？莫非我去錯咗迪士尼嘉年華？坐定後周圍望，馮仁昭肯定Twins嘅演唱會係史上最多小朋友睇嘅演唱會。
Twins呢個演唱會亦相當適合小朋友睇，不停有漫畫同貓公仔出現，而Twins嘅蔡卓妍同鍾欣桐都成廿歲人，但佢哋講啲嘢真係幾天真吓，唔怪得同啲五、六歲嘅小朋友咁啱channel。
馮仁昭睇睇吓，反而對啲小朋友重有興趣，想睇吓佢哋究竟點睇Twins嘅演出，個演唱會開始冇幾耐，就失驚無神放煙花，嚇咗班小朋友一跳。
現場個個小朋友睇到津津有味，而一齊嚟嘅父母就木無表情，不過馮仁昭身邊位小朋友都係少睇演唱會，睇到九點半就已經瞓着咗，結果佢父母九點九就抱咗個小朋友離場。
不過唔係個個小朋友都咁早瞓，坐喺馮仁昭前面個小朋友就十分精靈活潑，當Twins介紹一班小朋友舞蹈員出場時，嗰個小朋友竟然誤會係即場招募，博命舉手話：「我跳！我跳！」
演唱會十一點半完，馮仁昭十一點去廁所時，聽到有個阿媽因為帶個仔去廁所而同工作人員嗌交，馮仁昭睇完Twins演唱會，領悟到一個道理，就係天下父母真偉大！
撰文：馮仁昭