做咗香港科技園公司行政總裁唔夠半年嘅譚宗定，噚日喺一個「創意領袖交流會」上，講到佢發明𠵱家喺電子手帳Palm用緊嘅龍珠晶片嘅過程。佢話創意唔一定喺開會嘅時候出現。原來九五年佢重喺摩托羅拉工作嘅時候，有一日沖涼時諗到電腦係為西方人發明，所以有鍵盤；佢諗，如果可以製造一塊晶片，識得辨認中國人寫嘅字，變成一個電子手帳；唔用鍵盤，電腦嘅體積就可以大大縮細。於是佢衝出浴室，寫低呢個意念，當時咁啱電視播緊卡通片《龍珠》，佢就把呢塊晶片叫做「龍珠」喇。
第二日，譚總裁即刻向負責內地傳呼機市場嘅副總裁建議生產「龍珠傳呼機」，但嗰位副總裁話，摩托羅拉傳呼機喺內地已賺大錢，唔使再試新產品。後來，喺美國矽谷嘅Palm（當時只係一家得十二人嘅細公司）聞風而至，向佢攞咗龍珠嘅生產權，帶來今日嘅電子手帳一哥Palm。
佢重話，好多人都唔知道，影響咁深遠嘅發明，PalmPilot係來自香港人，香港人重成日以為自己唔得。佢叫香港人唔好妄自菲薄，其實香港可以做創意之都。
阿譚重批評香港以往比亞洲其他地區落後，連科學園都無，但新政府已經改變，兩年前已經有科技園。佢又為香港嘅科技前景把脈，佢估喺集成電路設計嘅範疇，香港兩至三年內會有成果，生物科技就要五至十年至會見到成績咁話。佢又話，如果政府唔識點樣發展科技，佢就去教政府點做。
傳真︰2623-9278
電郵︰