拍拖談戀愛，幾乎是每一個女孩子也會憧憬的事情，但對現階段的林敏俐而言，戀愛卻是毫不重要，她的父親去年過身後，她已沒有再接受男孩子的追求，而她的腦海中，更不曾出現「戀愛」兩個字。
「咁多年以嚟，我都拍過一、兩次拖，但自從爹哋過身之後，我要花更多時間去照顧我嘅家人，試問我又邊度有時間去談戀愛？
「現階段我嘅感情生活係一片空白，因為對我嚟講，家庭、學業同愛情之中，家庭一定行先，其次就係學業，自從我當選之後，已經好少時間可以同屋企人一齊，所以，早排媽咪同妹妹由美國過嚟香港陪我，我有時間嘅話，都寧願陪吓屋企人。雖然𠵱家佢哋返咗美國，我自己又咁忙，但我都寧願夜晚嗰陣瞓少啲，同佢哋傾吓長途電話。」
完成了父親的心願，但卻暫時放棄了學業，林敏俐的心情可謂相當矛盾。
「我大學讀咗三年，重有兩年先至畢業，但如果我讀完書先至參選，又好似遲得滯……不過經驗呢樣嘢好寶貴，所以點都好，我都會好好珍惜我眼前嘅機會，畢業嘅嘢惟有遲多一、兩年至算啦。」
林敏俐天生「大家姐」性格，她喜歡照顧別人，把其他人當作自己妹妹般看待，就正如邀請她與亞軍左慧琪和季軍胡家惠拍照當天，從她處處照顧着兩位「妹妹」已可見一斑。
林敏俐亡父的職業，一度成為大眾茶餘飯後議論紛紛的話題，但林敏俐表示不會介意，無論怎樣，父親在她的心目中永遠是第一位，永遠是她尊敬的好爸爸。筆者曾好奇問林敏俐可有看過父親當年工作或者出版的成人雜誌時，林敏俐笑說：「唔知點解，我真係冇咁嘅好奇心，況且都事隔咁多年啦。」
撰文：戴彩煥
攝影：林德雄
化妝：KwoChing
髮型：Ringo（byRever）
服裝：連卡佛