應屆港姐冠軍林敏俐今日的成功，原來是拜她亡父所賜，因為林父早在多年前已希望林敏俐參選港姐，直至去年林父病逝，林敏俐為完成亡父心願，才決定在今年參選。難怪林敏俐在當選一刻，心中不禁叫道：「爹哋，我成功咗啦。」
下月二十五日才滿二十二歲的應屆港姐冠軍林敏俐，外表看來較實際年齡成熟，原來自從去年她的父親因病逝世後，她便負起照顧一家人的重任，故此她不能像小女孩般隨便向人撒嬌，更不能在人前表現軟弱，在她的母親和兩個妹妹眼中，林敏俐絕對是個既獨立又堅強的女性。
雖然林敏俐父親林國光早年在成人雜誌《龍虎豹》任職，並曾經自資出版另一本成人雜誌《男子漢》而一度被稱為「鹹書大亨」，但在林敏俐心目中，父親永遠是她最疼愛、最尊敬的人，所以去年她父親突然離開人世，正是她人生路上一個最大打擊。
「我爹哋一向有做身體檢查，平時只係血壓高咗啲，我哋完全冇諗過佢身體會有啲乜嘢大問題出現。有一晚，我喺學校溫書溫到凌晨點幾鐘，準備嚟緊嘅考試，我細妹突然打電話畀我，佢一路喊，一路話爹哋唔得，我問佢，乜嘢唔得啫？做乜講到唔清唔楚㗎？我細妹先至話畀我知，爹哋喺公路揸揸吓車突然心臟病發，救唔番！嗰一刻我完全唔可以相信，完全接受唔到，心裏面諗，冇可能，之前佢重好地地，根本冇可能發生呢啲事……」
林敏俐飛車往醫院途中已泣不成聲，但當她抵達醫院後，她強迫自己要將淚水收乾。
「由細到大，我最錫係爹哋，每次我出街或者返學，都會錫啖爹哋，然後講聲『lloveyou』先至走，感情嘅嘢，可以話完完全全表達出嚟，唔會隱藏，但我爹哋過身嗰日，我媽咪同我兩個妹妹已經好傷心，喊得好厲害，我再喊落去，佢哋咪重更加傷心？
「我覺得自己唔可以再喊落去，因為屋企裏面最堅強係爹哋，第二係我，如果我再繼續喊，咁咪冇人可以保護到媽咪同妹妹？重有就係邊個可以去辦爹哋嘅身後事？所以自從爹哋過身之後，我自己嘅責任感大咗好多，就好似係要代替爹哋保護呢個家。」
飽受喪父之痛的林敏俐，一方面要照顧母親和妹妹，另一方面，她要完成父親生前的心願，就是要參選港姐。
「我十七歲嗰年，爹哋已經叫我參選港姐，佢唔係想我飛上枝頭，或者係想我點樣富貴，因為屋企環境都唔算差，而佢亦唔係要我一定攞獎，佢只係想我從選美過程當中體驗人生，開吓眼界。我好記得早兩年爹哋又再同我提過，但當陣時我冇應承佢，直至佢過身之後，我希望完成佢嘅心願，所以我今年就報名參加。」
原來林敏俐父親生前曾給女兒一句座右銘，就是「若要成功，必先快人一步」，於是林敏俐立下決心在今年參選港姐後，便展開一連串的備戰工夫，例如翻看過去十年港姐選美的錄影帶、上網查看有關選美的資料、報讀模特兒班學習儀態等，當然不能缺少的是喼弗美容，以最佳姿態示人！
「港姐決賽當晚，當我知道自己得咗冠軍嗰一刻，我心裏面第一句說話，就係同爹哋講：爹哋，我成功咗啦！」
林敏俐為完成亡父心願而下的一番苦功，相信林父在天之靈也會感到安慰。