唔知大家重記唔記得，喺年前某大國際性車展上，福特曾展出一款名為StreetKa嘅概念開篷小跑車，當時曾惹來不少車迷嘅注視目光呢？及至最近，廠方決定將之正式投產，除會於明年初正式推出外，而且重率先響嚟緊月底舉行嘅法國巴黎車展上現身㖭。
外形上，快將推出嘅StreetKa與當年概念型號頗為相近，除保留有圓渾車身線條外，加上16吋跑車合金軨組合、拋沙板設計、開關容易嘅手動篷頂、全新尾燈及尾喉配搭等等，都將其開篷小跑車形象，毫無保留地展示出來。車廂布局則與現有Ka型號相近，但就改配上全新兩幅式軚盤設計，把持感十足外，匹配仿桶形跑車座椅，可謂跑味十足。
引擎配搭方面，新車將會用上一台全新1.6公升Duratec引擎，馬力輸出高達95ps/5500rpm，扭力則為13.8kgm/4250rpm，而且重有低耗油量特點，同埋符合Euro4環保規格，可謂既慳油又環保㗎。有興趣嘅朋友，就要留意關於巴黎車展嘅消息喇！