下星期六便是中秋佳節，雖然口吃着月餅、手拿着燈籠，但仍覺現今的中秋氣氛一年淡過一年。想過一個熱鬧而充滿氣氛的中秋節，有冇興趣由朝玩到晚，朝早採摘應節的菱角、夜晚燃放孔明燈許個願，讓今個中秋和過往的與別不同，玩得更精采。
記者：區佩嫦 攝影：陳盛臣 ImageGirls：Vicki、Mon
每逢中秋，總會食吓應節的菱角，不過親自採摘菱角的機會卻難能可貴，所以採菱角便成為重頭戲之一。要採菱角其實一啲都唔難，只要坐在園主事先準備好的小浮板上，然後用樹枝或燒烤叉一鈎便可，一鈎一摘，唔使一分鐘就可以摘到幾十粒啦！池塘的水只有一呎深，若然唔怕污糟，大人小朋友不妨直接踩落水採菱角，更加好玩！
無論用乜方法摘都好，摘到的菱角均呈淡淡的墨綠色，外表同一般所見黑麻麻的不同，觀感較滑潺潺。而採摘後嘅菱角，可以交給園主，園主會幫你免費煮熟，味道鮮甜，再加上辛辛苦苦採摘得來的菱角，份外好食。
中秋佳節，當然少不了製作及燃放孔明燈。一直以來孔明燈是民間的許願活動之一，相傳只要在燈上寫下心願，當孔明燈升上天空時，便代表向上天許下願望。孔明燈上升的原理其實同熱氣球相差無幾，只要在燈內放着已滲滿火水的冥強，燈內的熱空氣便會使孔明燈上升，當燃料耗盡時，孔明燈便會徐徐下墜，大約可維持十分鐘左右。不過鑑於秋天風高物燥，加上讓孔明燈任意在天上飛行屬於違法行為，所以園主會將孔明燈用繩綁着，當孔明燈差不多燃油耗盡時便會將燈拉回地面，咁就唔怕觸犯法例。由於放孔明燈需燃點火燄，所以只可大朋友參與，為免意外發生，各位小朋友只可在旁觀看孔明燈升空。
想為晚上的BBQ加餸，不妨在這個迷你蝦池釣釣園主特別為閣下而設的大頭蝦。蝦池由迷你泳池改建而成，池水雖然較深，但勝在蝦池能見度極高，由高望下，蝦的藏身處都清晰可見。各位不妨用$30租下魚竿、魚餌試試自己的身手，上釣後的大頭蝦更可以在燒烤晚會中享用，唔……諗起都口水流。
除了品嘗香甜的蘆薈肉外，小記認為露天的蘆薈浴亦一定要試，坐在大大的木盆中，感覺恍如古代美人出浴般，夠晒好Feel。蘆薈浴以蘆薈漿及蘆薈葉代替沐浴露及海綿。蘆薈漿由新鮮蘆薈肉打成，泡沫極度豐富，搽上身後肌膚立時變得又白又滑，效果絕對即時可見。要沖這個蘆薈浴收費為$50，還附送蘆薈飲品一杯，邊歎大自然景色、邊享凍飲，確是人生樂事。
浸完蘆薈浴，不如到浴場旁的小魚池與小朋友一齊捉魚仔，享受家庭樂。魚池面積約有一千平方呎，小朋友可以站在池中，徒手捉金魚，考考自己身手的敏捷程度。各位可以在池內捉一個鐘頭魚，每個鐘頭收費$20，即使各位捉晒池內嘅所有金魚，每次都只可以帶走三條戰利品，不妨捉晒啲魚仔先慢慢揀。
入夜後，除咗放孔明燈，各位還可以大吃一餐，食物有雞翼、豬扒、牛扒等，加上朝早所釣的大蝦，邊燒邊賞月，簡直人生一樂也。
日期：9月20日或21日或22日
票價：$128（成人）、$98（4-12歲，3歲或以下免費）
費用包括：採菱角、孔明燈製作及燃放、燒烤晚會等，其餘節目均需自費參加。
時間：下午三時三十分至晚上八時
查詢電話：26747812?26742256
蘆薈天地地址：新界粉嶺丹竹坑新屋仔村35號
交通：可於粉嶺火車站乘搭專線小巴56K，告訴小巴司機於蘆薈天地落車，再步行2分鐘便到達；或在粉嶺火車站乘的士到園地門口，車費約$40；園內並設有免費停車場可供私家車停泊。
日期：9月20日或21日或22日
票價：$168（成人及小童同價，3歲以下免費）
費用包括：專車接送、採菱角、孔明燈製作及燃放、燒烤晚會、遊戲抽獎等，其餘節目均需自費參加。
查詢電話：23968811（香港國際旅遊公司）
集合及散隊地點：九龍塘火車站根德道出口
集合時間：下午三時
完結時間：晚上十時