上星期日講「新亞桑拿」海報，乃係逸夫書院迎新營調皮頑皮之作，用以整蠱新亞，新亞書院高層聽講嬲到面紅。律師T睇完之後，笑到㗎㗎聲，佢位姪女係新亞畢業生，自己位公子今年在港大畢業，對大學生生活十分清楚，所以不過份怪責啲學生低品味；因為今日嘅大學生係「打機」一代，睇《壹本便利》一代，並非佢當年睇《明報月刊》、《大學生活》，打橋牌嗰一代人也。
律師T話：「其實葵涌有一間新亞桑拿，宣傳海報喺荃灣區好容易見到，可能其中一張就俾逸夫書院學生攞咗去改頭換臉。我一個客人住響荃灣區，久唔久就去新亞桑拿沖涼，據佢講，嗱！佢係咁講㗎，間桑拿係正宗骨場，比較正經，係可以去試吓、驗證吓，睇吓係唔係。但自從中大迎新營搞出『新亞桑拿』事件後，客人老婆好緊張，大興問罪之師，唔准佢去葵涌新亞桑拿，客人又話新亞桑拿嘅老細好唔高興，俾啲大學生害到少咗生意喎！」
呢個世界真係顛倒晒。都唔知邊個搞到邊個，葵涌嗰間「新亞桑拿」即刻改名啦，不過唔好影射本港八間大學喎！左丁山問律師T：「呢啲事有冇法律責任呢？」律師T話：「算啦，任何一方都不宜採取法律行動，當一場遊戲就算，你搵親我，要好多錢，我搵大狀，你又要使好多錢，玩嚟做乜，隔得三十年，搞出事嘅學生可能做咗財政司司長，佢到時會對《蘋果》記者講述呢件甜蜜回憶㖭！」