每年十月，無綫都會製作綜藝節目《歡樂今宵》（EYT），但馮仁昭聽聞今年無綫因為節目政策問題，決定取消唔做，搞到年年做開EYT嘅阿姐汪明荃好唔開心，覺得好似好失落咁，於是走去同無綫製作部助理總監何麗全理論，可惜無綫高層已經決定咗，無論阿姐點講都係冇用。
其實，阿姐鍾意做EYT，除咗因為呢個節目夠輕鬆冇壓力之外，最主要都係因為可以畀到阿姐一個機會，同成班好耐冇見嘅同事維繫感情。無綫今年唔搞EYT，唔單止係阿姐失落，對於其餘一班EYT藝員，好似劉曉彤、羅君左、吳家樂、馬小靈同祝文君佢哋嚟講，就更加慘，因為平時無綫已經冇乜節目啱佢哋做，一心以為靠EYT可以爆騷，𠵱家冇得做，咁咪即係變相減少收入囉！
成龍嘅新戲《特務踢死兔》今個月尾會喺全美公映，佢當然會把握機會宣傳新片。前日佢幫一場美國棒球賽主持開球禮，現場觀眾一見到呢個特別嘉賓，表現得好鬼熱情。
成龍前日去咗喺雅靈頓舉行嘅棒球賽，由德薩斯游騎兵迎戰西雅圖水手隊，佢留咗一把長髮重着住唐裝主持開球禮，佢將個棒球向天一擲之後，在場嘅球迷即刻熱烈歡呼，就連德薩斯隊嘅球手同成龍握手嗰陣都特別向佢鞠躬，真係好威喎！
陳松伶（松松）日前喺上海做完騷返香港，佢喺香港機場攞行李嗰陣，同佢同行嗰位肥家姐話好唔舒服好想嘔，於是松松即刻喺個LV行李袋度，準備攞個膠袋出嚟畀佢用，點知松松一打開個LV袋，肥家姐已經忍唔住衝埋去嘔，搞到成個LV袋都係嘔吐物之餘，重搞到一地都係，松松話嗰一刻真係瘀到「嘔電」！
余文樂（阿樂）同陳見飛噚日喺電視城綵排，因為有傳陳見飛個細佬陳冠希同阿樂不和，記者要求陳見飛同阿樂合照，佢哋兩個都好大方，點知阿樂身邊嗰位唱片公司同事就話：「唔好啦！阿樂未化妝，唔影相。」但係十分鐘前明明有成十幾對眼睇住阿樂化妝，而且之前都畀影，好彩阿樂都好大方咁同嗰位同事話：「唔緊要，影啦！」
好多人話年輕偶像厲害，將兩個有份量嘅女星搞到貼貼服服，不過噚日有個知情者同馮仁昭講，話年輕偶像一直係想一腳踏兩船，但天后級歌手又點會肯，所以先會同佢分手。表面好似造成玉女獨贏局面，好不風騷，但佢唔知年輕偶像由頭到尾都唔想放棄天后歌手，偶然都會用各種藉口同對方保持聯絡。天后歌手啲朋友叫佢唔好再心軟，如果佢再番轉頭，佢啲朋友會睇唔起佢，所以佢今次企得幾硬，唔再聽年輕偶像嘅花言巧語。
麥浚龍（Juno）噚日接受新城訪問，有報道話蕭正楠（Edwin）嘅歌曲《惡果》MV有影射佢之嫌，Juno話：「我覺得蕭正楠冇必要咁做，佢應該都係照安排去做嘢啫。」
另外，對於有傳Juno嘅fans係職業fans，佢話所有追隨自己嘅fans都係真心欣賞自己，佢重話：「我認為買fans係一件好可恥嘅事，所以我都認同Edwin嘅講法，如果我啲fans真係買番嚟，佢哋就唔使喺機場等我成日啦！我一開始已經唔係靠個樣，我係靠實力㗎。」
排骨女星未同內地富商一齊之前，好多人都以為佢搭上咗一個江湖大佬，重有消息話佢幫江湖大佬生咗個仔，所以都好多人畀面排骨女星，但實情排骨女星只係江湖大佬正印女友嘅傍友，佢自己周圍同人講有江湖大佬照，目的都係想大家有美麗嘅誤會，有任何機會上位，排骨女星都唔會放過。
早前喺深圳有一個騙子M先生周圍同人講傾緊邀請蕭亞軒去深圳開發布會，佢重問人攞錢去搞一張價值五百蚊嘅港澳通行證，公安已經着手調查呢件事。有傳呢個M先生係經柯受良（小黑）介紹去到一間酒吧做嘢，不過小黑後來證實咗自己係唔識呢個人嘅！