趙飛雲近排貼身追蹤美股及港股走勢，周三已覺得美股反彈將完，造淡快進入射程。周三晚杜指升至8726高位後，倒跌21點，收8581，日線圖陰陽燭出現近似射擊之星的形態，反映杜指見頂機會相當大，可惜周四恒指應跌未跌，趙飛雲為求謹慎，多觀望一日，便失去極佳先機。杜指周四晚果然以大陰燭下跌201點，噚日雖然一早追貨，但亦要以0.255元才買到恒指Put輪9444。
事實上，市場並無預料到格老發表利淡美國經濟的言論，所以不但美股跌得急，其他主要股市反應亦頗激烈，恒指噚日大跌245點，收9650。由於晚節不保，恒指全周下跌70點，跌幅0.7%，連跌3周。
杜指MACD線回升2日後，噚日開始回落，若趨勢持續，杜指8200及8000支持位估計可能守唔穩，跌勢會轉急及繼續尋底。港股噚日低位9609，再創今年新低，距98年至今長期上升軌9589支持位十分接近，一旦確認失守，去年911事件低位8894相信好快會跌穿。若見恒指跌穿長期升軌支持，恒指Put輪可伺機加注。
收市後，趙飛雲睇番啲恒指Put輪數據，發覺同期嘅Put輪，目前9448較9444略為優勝，不過並非相差太遠，日後再買Put輪時可再參考兩者數據變化才作決定，不過恒指若跌穿9600，則9448較可取。倉內嘅海域（1220）噚日停牌，等待公布消息。
趙飛雲