喺DC上威晒嘅Online遊戲《PSO》，呢個星期終於殺到上GAMECUBE啦！自從隻Game到咗，Game場好多舖頭都覺得，連帶GAMECUBE主機都好似賣多咗；遊戲連Modem價格約$560-$580（定價9,800日圓），單遊戲版就平啲，約$400（定價6,800日圓），不過暫時知道，只可以用56K窄頻上網連線對戰，至於寬頻接駁器，預計要等到10月先推出。
文：打機鐵人
XBOX隻機械人模擬遊戲《鐵騎》，啱啱撞正星期三打8號風球抵港，搞到好多Game舖都狼狽非常；事關隻Game連埋個專用遊戲控制桿，足足有10KG咁重，撞正橫風橫雨，又怕佢俾雨淋濕，呢次打風真累事！據了解，呢隻《鐵騎》一定要配番呢個專用控制桿先玩到，單係呢10KG嘅運費，就差唔多要成$300-$400，所以呢隻Game雖然係19,800日圓（約港幣$1,300），嚟到香港連運費就要成$1,650-$1,880。
即將喺9月26日推出嘅SWANCRSTAL新Game《GUNDAMMONOEYES》，隨行貨會有初回特典附送，當中包括有5個主角嘅Figure，同喺日本舖頭預訂先有嘅特典CD-ROM，有興趣不妨落Game場逛逛。