格老叫政府慳啲花錢，否則政府財赤增加，可能會迫使利率趨升，加重對美國經濟壓力。此番言論將令布殊政府再三考慮是否攻打伊拉克，因為一旦開戰，美國一定有龐大支出，呢一次布殊都幾為難，格老嘅言論幾乎係100%暗示一旦開戰，美國經濟肯定要再尋底。
港股近日牛牛皮皮，買賣兩閒，不過噚日就見唔少大經紀牌如大摩及里昂等力沽電訊類股份。有傳聞話港股噚日跌245點是因為市場憂慮港元脫鈎，但阿虎相信真正原因應該係法國電訊業績奇差，引致有歐資減持電訊股投資比重，所以聯通（762）挫5.4%；中移動（941）挫2.2%；電盈（008）挫4.8%；Sunday（866）挫5%。睇嚟電盈1元關口可能會失守，市場傳出電盈可能併股及供股。高盛則話冇眼睇Sunday。
其士建築（579）噚日勁升112.7%，收報0.134元，不過成交只得4.07萬，真係阿虎一個人都可掃起佢。阿虎循例問下黑客知唔知乜事，佢話都唔多清楚，不過近期細價股冇人玩，股價又低殘，大股東若有錢，相信會願意提出私有化，可能有人憧憬隻股私有化。
大陶精密（8041）勁升27%後停牌。市場傳隻股將引入策略性股東，公司則話等待宣布一項國內合資項目嘅通告。公司曾話過正與兩名合作夥伴傾緊成立一間合資公司，生產陶瓷套圈產品，但交易不會涉及股權變動，但合資項目之投資額就頗大，達3至4億元，相信項目一旦傾成，大陶必有集資壓力。
阿 虎