我Apple姐出咗名係淑女，當然好享受有風度嘅男士細心關懷啦，好似開車門同拉櫈呢啲門面嘢，我都統統受落㗎。 木無表情 話說前幾日，我喺中環威靈頓街截的士嘅時候，咁啱靚女混血女模Danielle都同我一樣等緊的士，但係我哋兩個都好唔好彩，撞正啲全無紳士風度嘅男士，莫講話唔會讓你，有車到時重好大動作咁爭住上車㖭！ 我Apple姐見慣世面，當然可以從容不迫啦，但係我見到Danielle就由木無表情變到一臉𤷪𤺧，淨係未講粗口咋。