電腦新產品：<br>即睇 即抄 即印 數碼相簿換裝再度出擊電腦新產品：
即睇 即抄 即印 數碼相簿換裝再度出擊
目前各類記憶卡售價都有大幅下降嘅趨勢，一般數碼相機用家買張256MB已夠應付日常所需。但遇着出外旅行及公幹又怎辦呢？其實除咗攜帶沉重嘅手提電腦外，不妨考慮一下容量超大嘅數碼相簿。而今日介紹呢款有別一般機種，加入新功能之餘亦可配合多款周邊使用，屬多功能型數碼相簿。
記者：徐影龍 攝影：林栢鈞 ImageGirl：王穎
即睇
彩芒睇相兼容EXIF制式
呢部VISTA在體積上不算太大，主要為用家儲存在戶外拍攝嘅相片，故有數碼相簿之稱。過往數碼相簿只專注提升資料儲存容量，而呢部VISTA則新加入一個1.8"彩色LCD，約莫等於數碼相機最普及嘅LCD尺寸，支援全彩（TrueColor）顯示，以及相片放大、旋轉等簡單修改，讓用家可以一次過預覽及編輯大量數碼相片。
另一項新加入嘅特色，就係支援EXIF相片資料格式，除相片容量、檔名及拍攝時間外，重可顯示相機型號、以及幾多光圈、快門拍攝等資料，方便用家觀賞相片時明瞭相機設定，從而改善拍攝技巧之用。
即抄
支援五大記憶卡
VISTA構造並不複雜，除彩色LCD外，最主要部份就係一個2.5"硬碟。以測試之20GB型號為例，已可儲存二萬張超高解像度相片（以每張1MB計），拍友以後影相毋須再顧忌記憶空間問題，爽爽快快地以高質素格式記錄數碼相片，盡情拍攝靚人靚景。不過顯示容量太大嘅相片時會出現拖慢情形，可嘗試將目錄由預視圖片改為檔名稱模式，操作上會方便快捷得多。
VISTA主機本身只對應CF記憶卡，面對現今嘅數碼相機市場，支援上似乎有所不足。故此廠方同時推出一款外置式轉換器，插入舊有CF槽後，便可讀取五大記憶卡制式，當中包括SmartMedia、MMC、SD卡、MemoryStick以及IBM嘅MicroDrive等，覆蓋範圍非常之廣，適合所有數碼相機用家需要。
即印
直駁Printer印相
配件支援亦係VISTA強項之一，除之前嘅五合一記憶卡轉換器外，同期重有兩大配接器：FireWire介面及PrinterPort介面。前者可將VISTA機內之大量資料快速傳輸至個人電腦內，而後者則可直駁具PrinterPort之打印機，唔經電腦就可即時列印靚相。兩種配接器分別針對進階及新手用家，用家可按需要而選，免致浪費金錢喺用唔到嘅地方。據代理所講，今後仍會繼續大玩周邊裝置，嚟緊就有支援播放MP3及對應網絡嘅Ethernet配接器推出，令用家毋須花太多錢升級整部主機，便可不斷增強數碼相簿之功能。
抵讚
有咗VISTA後狂影高質數碼相都冇問題，更可以彩芒即時返睇。
要彈
讀相時間稍慢、賣價較高一般人難負擔，配埋周邊開支更大。
思維集團
查詢電話：29551000