小伏做咗阿松老婆後，新聞真係沒完沒了。噚日《國際先驅論壇報》都玩埋佢倆夫婦一份，該報嘅記者Crampton先生為阿松獻計，認為如果申請入中大讀書以取得學生簽證身份行唔通，不如返去結婚度蜜月嘅夏威夷，嗰度可以靜靜地申請張綠卡都冇人知，然後嫁夫隨夫便順理成章來港居住。至於最後一招，Crampton話阿松可以考慮考入清華嘅經濟系，反正香港嘅經濟狀況咁差勁，可乘機走開吓。
一向消息靈通嘅曹仁超又玩埋一份，話小伏有一日同阿松去酒店飲afternoontea，點知被班老外認出，竟然用英文請松嫂表演跳水，小伏聽唔明，最後要由阿松以流利外語推咗。結果，阿松決定為老婆搵個私人家庭教師，惡補一下，嘩，呢啲傳聞梗係無法證實。
重有一個講法，話小伏同友人訴苦，話懷孕好辛苦，不過，八方又聽過，小伏日日在家中蹦蹦跳。至於向來消息準確之高人，則飛鴿傳書，話松嫂真係有喜。不過，阿松老來得子太過開心，唔想講出去，所以連老同學問到，也不肯承認。其實喜事怕乜人知呀，恭喜晒。
傳真︰2623-9278
電郵︰