冇見燈頭榮成年，呢排忽然蒲頭。此君可謂香港潮流圈奇萉，幾年前枕住開中港拖頭，後尾轉行走裏原宿水貨，可惜入行時已水尾，惟有轉行拆大廈僭建物，當時幾千蚊拆一個騎樓，一日拆兩三個，佢話收入拍得住日本Nigo。
不過早排觀塘發生單拆僭建物工程意外，燈頭榮呢啲無牌工人即刻冇得撈。失業惟有繼續創業，燈頭榮重出江湖，再返油旺區三角地帶信和、特區、兆萬，不過唔係開舖，係想Sell條橋畀老闆「搞啲嘢」。
原來佢收到風，兆萬地庫兩層大部份舖11月尾滿約，兆萬大業主唔滿意嗰度太過靜，嫌唔夠Noise（迴響），起碼要搞到二、三樓咁有主題，租金先可以企硬。
燈頭榮：「𠵱家地庫冇乜強舖，即係唔夠號召力。好多舖頭唔知Sell咩，即係冇晒Focus（焦點）。每日黃昏至開舖，即係管理不善。本來一個旺場，竟然就咁白白浪費。
「我要Sell個大老闆將嗰兩層變成主題商場，𠵱家咁興波鞋，一於搞波鞋場，搵晒啲水貨行貨波鞋舖落去坐鎮，個場就叫兆萬科時，舖頭名可以叫燈撈舖，不出三個月肯定可搶晒信和啲客。到時租金叫座力自然高。」且看到時搞唔搞得成。
主持人：大食Jack
八卦熱報：