早於今年2月初，我哋《車天車地》版率先在港測試嘅現代Sonata新車，久經大半年時間嘅準備，代理終於落實在港推出，以壯韓國車嘅聲勢之餘，亦好等香港車迷能近距離接觸到新一代韓國高級轎車嘅造工嘛！既豪華舒適，重以一台2.0公升偈匹配4前速半自動波箱，但車價不過14萬，較同級日本車來得更具號召力呢！
記者、攝影：陳偉林
相隔大半年時間，再重遇嘅新一代Sonata四門轎車，仍教人有一份吸引力，尤以一對橢圓大燈組合，匹配一體式嘅泵把連氣霸，以及原廠霧燈同埋四輪15吋合金胎軨，別有一番歐洲車味道之餘，同樣係雙圓聚焦設計嘅尾燈，重好有積架汽車嘅味道㖭！
全新鋪排嘅車廂設計，烘托有一份貴氣之餘，前後排高級皮椅配搭，乘坐既舒適又見愜意，除四門電窗、門邊電鏡及中央門鎖外，唔少得重有電天窗、原廠恒溫冷氣同高級音響㖭！還有心思縝密嘅前後獨立房燈，以及雙安全氣袋配備㗎！
新車用上一台2.0公升直4DOHC偈，運轉寧靜暢順，匹配一套4前速半自動波，既有駕駛自如感，又見有操控手波車嘅樂趣。穩紮底盤結構配合柔韌有力嘅吸震筒外，四輪高效能碟式制動，另備有ABS連EBD裝置，自然倍見有可靠安全嘅體驗㗎！
新車售價：$139,800
車輛提供：太古亞洲汽車（25272777）