鴻運為愛琴海岸搞嘅「買樓送車」，噚日抽獎。效無綫台慶壓軸送車形式，要三十幾個愛琴內購買家，揀匙開車門定得主。
買家逐個對住個匙窿狂插猛擰，祈求幸運之神眷顧。旁邊鴻運同新地嘅人，特別係新地Eric周國賢，忘情咁為佢地打氣。
頭幾位都開唔到，直至中獎機會有九分一嘅梁小姐，攞匙嗰陣已緊張到有啲手震，聽到「嚓」一聲後，即時肢體失控，重喜極而泣，喊到差啲收唔到聲。周圍嘅人亦為佢高興，鼓掌祝賀，又笑又叫。
二十幾歲嘅梁小姐話今次係第一次買樓，又係第一次中獎，又唔怪得佢失晒儀態嘅。佢用130萬買咗3座中層688方呎單位，部車會自己用，因為住愛琴海岸有車方便好多，但重未決定揀乜色。
另鴻運田國強話，第二部車會喺公開發售時，送畀經鴻運經手嘅買家，每部值成12.9萬㗎。
今日係黑色星期五，但竟然有七個記者會，好似從未有咁多。當中五個係代理搞，兩個係發展商搞嘅。睇嚟代理之間同發展商，要片到七彩先至搶到傳媒採訪。對記者嚟講，要跑晒咁多單都幾係嘢。
另外，高力國際今日喺香港舉行展銷會，推售新西蘭威靈頓假日酒店，聽講發展商重提供五年每年8厘淨租金回報保證㖭，認真夠膽。
恒基𠵱家連住宅租盤都搵埋代理做，好似單幢新樓豐裕軒，有112個單位，面積364至731呎，就畀中原做獨家代理。個盤喺元朗區，點解留嚟收租，認真考起。
聽講中記用一個月，做咗份元朗成交個案，及租客對象報告畀恒基，先至攞到代理權。據聞發展商笑住講呎租有十三蚊，甚至十五六蚊就最好，不過附近就算係新元朗中心，呎租都係九到十蚊咋。
招聘報章Recruit主席周融，噚日向政府提出一套搞活樓市同經濟方案。其中一項係由政府提供樓價25%低息信貸，上限100萬，還款期20年，其中5年只供息不供本。由於政府可以發債券借平錢，再轉借畀置業人士，即係一個仙都唔使出。另建議供樓利息扣稅延長到10年。首次置業者，頭3年供樓利息可全部扣稅。
今日出街嘅Recruit，重有畀特首的信同建議。
蘭西
電郵地址：