有波友向我求大俠哭波喪，話前日重槌追捧曼聯同利物浦兩支紅色大軍，累佢損手爛腳。我相信唔少人前日一齊中伏。無計啦，鬼叫呢兩隊多擁躉，而好多人都唔忿氣，係都要長追上盤。
今季呢兩隊波真係輸死人，曼聯響超聯連開五鋪對家；利記重衰，連續三場波臨天光瀨尿失球，三場都和二比二，由上盤變下盤，大佬，佢哋位領隊侯利亞有心臟病㗎！我亦好明白賭仔追捧強隊嘅心態，情況就似買大細開咗幾鋪細，硬係唔忿氣要博鋪大咁。
不過睇見佢哋輸咗咁多場，我都忍唔住奉勸大家咪為鬥氣而長追，要客觀小心分析，唔通真係嫌荷包太脹咩？你睇吓德甲隊漢諾威，踢四場輸四場，如果一早長追佢𠵱家都唔知點算。
季前買咗一啲幾有質素球員嘅維拉利爾，繼圖圖盃出局後，西甲聯首仗又俾奧沙辛拿迫和，禮拜二重喺西班牙盃輸畀丙組仔；教咗兩年嘅教練域陀，立即成為第一個俾人炒嘅西甲聯教頭，似乎快咗啲噃。我求大俠認為域陀都炒得，咁打咗四場聯賽，只得一分嘅英超聯韋斯咸領隊羅達點計先？
打比郡降落甲組之後，成績唔見好轉，重出現懷疑前鋒拉雲拿利詐傷事件。話說佢成日話腳痛，已經冇踢成五場波，而且已經返咗意大利療傷；領隊基哥利忍唔住就話，經會方研究過，拉雲拿利嘅傷勢其實應該冇問題，唔通拉雲拿利驚住下個月又冇糧出，所以提早鬆人。
都話家有一老如有一寶，車路士可以成為英超聯未敗之師，成三十六歲嘅蘇拿可以話係最大功臣，佢前晚對布力般又𡁻兩粒，𠵱家五場聯賽入咗四球，喺射手榜僅次於五球嘅韋托。講開又講，周三晚又真係幾利啲老鬼，艾芬保同簡尼基亞亦都為禾夫斯堡及格拉斯哥流浪入波，唔通老鬼波愈夜愈精神？
早前俾洛杉磯警方委任為「臨時警官」嘅奧尼爾，喺上個禮拜進行例行掃毒行動時，被人投訴對疑犯使用過分武力。事件被當地傳媒踢爆後，洛杉磯警方立即出嚟力撐奧尼爾，死話佢完全冇做錯云云。大家早知「巨無霸」平時係球場上「橫行無忌」，估唔到佢當差都係一樣咁鬼死霸道。