佘詩曼（阿佘）同郭羨妮兩位無綫花旦，成日都俾人傳佢哋為爭上位而不和，不過呢兩位阿姐喺人哋面前就好friend嘅，要爭都留番私底下爭啦！
最近阿佘同郭羨妮分別為卓悅同莎莎兩間纖體公司做代言人，呢兩間公司都有門市賣化妝品，所以兩位花旦都可以任攞化妝品同護膚品。有日阿佘同郭羨妮咁啱一齊出現喺無綫化妝間，阿佘對住啲梳頭化妝嘅阿姐講：「你哋要唔要化妝品呀？要就出聲啦，我可以幫你哋攞㗎。」
阿佘此話一出，嗰班梳頭化妝嘅阿姐不知幾咁開心，在旁嘅郭羨妮見阿佘成功𠱁到班阿姐咁開心，即刻不甘示弱，同班阿姐講：「係啦，你哋想要乜嘢化妝品，我都可以攞㗎。」班阿姐聽完梗係笑到見牙唔見眼啦。呢啲就叫做鷸蚌相爭，漁人得利。
台灣人氣偶像周杰倫跟蔡依林嘅戀情日見明朗化，而最近有傳周杰倫嘅唱片發行權亦將由原屬BMG轉到蔡依林所屬嘅新力公司，所以佢哋以後就可以因利乘便，有更多合作嘅機會。而同周杰倫傳過緋聞嘅溫嵐，佢嘅唱片發行權都會轉到新力唱片，所以好快，周杰倫、溫嵐同蔡依林就會喺同一屋簷下，唔知佢哋到時一齊出嚟宣傳時，會唔會好尷尬呢？
影后早排諗住拍咗內地大導演部戲，可以幫佢打入國際市場，點知部戲開咗之後，無端端又多咗個最鍾意扮大牌嘅內地女星做呢部戲，影后心知不妙，因為佢知導演同呢位內地女星係情侶，咁導演一定主力捧自己女友啦！
大導演對啲男人戲就冇乜點，女人戲就緊張好多，如果拍自己女友，當然角度都拍多幾個，影后女星雖然拍到好谷氣，但已經上咗賊船，𠵱家谷氣都冇用啦！
某電影公司老闆唔知點解對啲妹妹仔咁有興趣，想當年佢已經好鍾意搵啲細路女拍戲，然後就發展進一步關係。不過佢都唔係未試過食檸檬，幾年前佢間電影公司全盛時期，佢就主動叫某靚女港姐跟佢，重叫佢唔好跟超級富豪。因為超級富豪女朋友多，但當時靚女港姐同超級富豪關係好好，富豪一出手就送價值成千萬嘅樓畀佢，而電影公司老闆一向出手低，知人哋出手高過自己咁多，所以都知難而退。
早幾日馮仁昭撞見周潤發，同佢講起呢輪樂壇出現咗好多新人，講起麥浚龍啲宣傳好強勁，大家都覺得幾有娛樂性。後來問起佢對近期人氣急升嘅余文樂點睇，發哥對佢好似唔係有太深印象，反而對蕭正楠就有啲記憶，話喺電視見到佢時，覺得呢個後生仔都唔錯。
發哥呢排得閒啲，早排同老婆返咗新加坡探外父外母，每日都有抽時間曬太陽同游水，皮膚黑咗，個樣睇落去比以前重精神咗㖭！
第二代富豪平日睇落斯斯文文，着晒西裝好gentleman，但原來佢好鬼惡死兼爛口，喺富豪公司做嘅朋友話畀馮仁昭知，第二代富豪可以連續講五十個字都係粗口，鬧起人嚟一鬧就鬧成半個鐘，而且係唔理男女都照鬧，面皮薄啲嘅人都好難頂得佢順。
陳松伶暗戀OK先生
陳松伶套新劇《生命天使》，噚日喺觀塘開記者會。陳松伶噚日宣布同新加坡DJ男友分手，不過佢又有新目標，佢話：「我同嗰個男仔都合作咗幾次，佢外形都OK！所以我叫佢做OK先生。」