馬時亨在極不願意嘅情況下，向公眾就細價股事件作出道歉。不過咁遲至道歉，就被一眾傳媒指為欠誠意及醜陋，無法挽回個人聲望，阿虎對佢有少少同情。其實搞到今時今日嘅地步，梁錦松要負責任最大，只要佢最初企硬，堅持呢份只不過係一份諮詢報告，而股災只係市場過份反應，然後按正常程序修訂諮詢建議，相信已經可以平息一場政治危機，不致鬧出連場國際笑話。不過，反正個市都咁悶，有笑話聽吓都係好。港股噚日升13點，收報9896，成交僅48.8億元。
市場觀望美國國會會否通過出兵伊拉克，睇個勢出兵機會日漸提高，芬佬短期內都唔會亂做嘢，在缺乏新錢流入下，新一季盈富基金（2800）發售額傳會縮至40億元。
海域集團（1220）噚日有少少熱身動作，股價勁升10.3%，收0.118元，成交741萬元。據聞海域會向主席葉劍波收購自動提款系統，若果股價造好成功配股，就會以現金找數，否則可能會發行新股收購。百江燃氣（8132）剛獲得60億元人民幣備用信貸，將有助加快城市燃氣管道網建設，股價昨日曾高見4元，長線依然睇好，但月來升幅唔細，短線或有調整，不如轉吼佢阿媽百仕達（1168）。百仕達下周三派中期成績表，照計盤數應該幾靚。
歐亞（932）噚日公布業績，賺2.9億元，增長9%，算係對股民有個交代，股價升7.8%，收0.83元。不過噚日公布業績，公司主席楊斌冇現身，可能又會令投資者產生慮疑，最怕國內傳媒又傳出楊斌被調查或軟禁等不利消息，所以有錢賺就應該收割，無謂太過大貪。
阿 虎