上市剛剛一個星期嘅龍發製藥（2898）都算炒得有誠意，除咗上市頭兩三日比較悶蛋外，好快已經見到鑊氣，喺咁差嘅環境下，炒家仍然咁有心機做好隻股票，都算相當有誠意。
龍發噚日升6.2%，收市報43仙，成交金額都有接近800百萬元。
經紀陳話，龍發招股之時，已經唱話有大陸客參與，搞到公開發售部份有成33倍超額認購，但亦因為咁，所以要將30球貨，由配售回撥去公開發售部份，而炒家亦要在頭兩日，悶到要咗貨嘅人沽番晒出嚟，收齊貨先至郁手。
不過，龍發起碼一直高於招股價，算有良心。睇嚟呢班炒家唔似家陣新進炒家咁急進，相信隻股重有一排玩。
另外，呢排仙股時興搞併股，據聞檸檬茶照住嘅上聯水泥（1060）亦可能搞併股，所以要小心。
上聯自天安中國（028）入股以來，都炒過好多轉，人哋亦一早回本，呢個時間搞併股，趁機收吓貨亦好正路。
慕容小初