立足香港車壇可以歷久常新，無畀車迷有看膩嘅感覺委實不易；而福特Focus推出至今，仍不乏捧場客。除造型予人耐看外，車廠今趟推出Facelifted新版，看來既時尚又有新鮮感，加上本身出眾嘅操控同舒適乘坐感，自然有一定號召力㗎！
特約記者、攝影：何仲恩
新車售價：$128,800
車輛提供：福特香港（25031032）
造型圓渾流暢嘅福特Focus五門掀背版，一直不乏捧場客支持，而新版嘅全新頭燈設計，匹配時款嘅蜂巢式鬼面罩連泵把同氣霸、車尾定翼連高置煞車燈，既吸引又見有活力感。再者，四輪新換裝嘅15吋跑車合金胎軨，匹配獨有四輪Racing懸掛裝備，何止有型有款，重有不落俗套嘅操控感㖭！
新版Focus沿用一台1.6公升直4DOHC偈，匹配4前速自動波，雖然表現唔算突出，但勝在慳油好力兼反應夠敏捷；而出眾嘅底盤結構，柔韌有力之餘重有不錯嘅循迹反應㖭！其次，一套可靠嘅制動裝置還備有ABS連EBD組合，令行車倍見可靠安穩㗎！
呢部Focus另一個賣點，會係設計匠心獨運嘅車廂陳設，除具人體工學設計嘅美譽外，空間又見闊落實用。而五門掀背版嘅後排左右獨立收摺設計，遇有需要更可整幅平放令尾廂空間倍增㗎！除電窗、電鏡同電天窗外，唔少得重有原廠冷氣同音響組合，後排重備有外置12V電插座，以及雙安全氣袋配搭。