自嘲垃圾婆　愛儲流行玩物
Maggie護心鏡成日揼心口

英皇3T小花之一的Maggie自嘲是個垃圾婆，因她收集了很多東西，包括閃卡、膠布及流行飾物等，Maggie早前更以一千六百元購下吹玻璃「護心鏡」頸鏈，但因太重而多次被鏈墜揼心口。

有「翻版王菲」之稱的英皇3T小花Maggie（劉思惠），對收集物件可謂非常多元化，她會儲貼紙、閃卡、膠布、信紙、玩具及首飾等，難怪Maggie自嘲說：「我係乜垃圾都儲，成個垃圾婆咁，啲朋友去親我屋企，都以為我係一個人住，但其實我係同媽咪一齊住，不過我比較自私，間屋已經俾我啲嘢霸晒。」

母女臭味相投
原來Maggie的媽媽都同樣有收集癮，但對於媽媽的「珍藏」，Maggie竟敢隨手扔到垃圾桶，她笑說：「梗係啦，我阿媽好鍾意儲單，睇完啲信呀、煤氣單同水費單，佢全部唔會掉嘅，佢重有成大叠過晒期嘅六合彩，唔知點解重要擺喺屋企。」

新寵水晶鏈
Maggie現時最愛購買各類流行飾物，每次她去日本旅行，必定滿載而歸。
早前Maggie在港以一千六百元購下一條吹玻璃頸鏈，但因類似「護心鏡」的圓形玻璃鏈墜太重，鏈墜經常揼Maggie心口，她說：「唔係講笑㗎，我試過追巴士嘅時候，俾條鏈揼心口，幾鬼痛呀。」
Maggie又透露水晶鏈是她目前的新寵飾物，她說：「我都係受Mandy（蔣雅文）感染，佢成個神婆咁，話戴水晶會旺，但係我就純粹覺得靚至買咋。」
採訪：朱芷瑩
攝影：黃文成