惡佬明講港珠澳大橋，講到中華白海豚，並非佢有厚愛於海豚，而係佢十年來畀香港政府嘅環保政策搞到頭暈眼花。建築界中人對環保冇乜好感，皆因環保評估阻延工程，環保法例增加工時成本，有時大量泥頭車（如填海）經過某區，又要區議會諮詢，總之就係阻手阻腳。譬如韓國公司建九號碼頭，挖海泥，丟落大海（近港珠澳大橋水域），後來發覺啲海泥含有毒素，殺傷海產，環保人士抗議，特區政府唔准韓國公司將啲淤泥丟棄於大海。挖咗泥上嚟，唔准丟，擺去邊？承造商當堂失晒預算，面都黑晒。
講咁多，並非話惡佬明唔理環保，佢亦好注重新鮮空氣、樹木成蔭嘅郊外環境，只係，正如惡佬明話齋：「特區政府千祈要政策一致，有始有終，既有塱原濕地先例，政府唔可以唔搞清楚港珠澳大橋嘅環保影響，唔好一時一樣，玩大細超啫；廖秀冬責任好大㗎，我哋搞建築，成日畀環保箍死，冇理由起港珠澳大橋就合埋雙眼。」
其實港珠澳大橋十畫未有一撇，乜嘢獨立第三者顧問報告都未見過，點會咁快燒到廖秀冬嗰度。站在惡佬明角度，大橋最好聽日就開始起，等啲行家有工做，但回心一諗，條橋百分之九十五嘅面積位於香港境外，請內地勞工會平好多，照粗略比例計，只會有百分之五嘅工人係香港人，惡佬明等未必得到好多利益也。