關之琳（之之）、劉德華、蘇永康和許志安昨日到又一城出席Soigne護膚品記者會。之之大讚男友黃家諾天生靚皮膚，不需為他做facial。而在台下她與華仔非常好傾，雞啄唔斷。
關之琳、劉德華、蘇永康及許志安昨日為護膚品牌Soigne在又一城舉行的記者會任嘉賓。之之表示今次出席純粹支持好友，並沒有酬勞，不過她和康仔及安仔三人，均獲贈首飾一件，三件首飾總值六位數字。而在台下時，之之與好友華仔不停密密傾。
問之之的護膚心得，她說：「我自己一定要瞓得夠，如果唔係啲毛孔就會好大，重有就係要夠水份。」再問之之有否與男友黃家諾（Jimmy）交換護膚心得？她說：「冇呀，我諗佢皮膚好係天生嘅，男仔冇乜整呢啲嘢嘅。」
那麼之之有否幫Jimmy做facial護膚呢？她笑說：「冇呀，佢都唔整嘅，不過佢就有投訴冇乜湯水，佢話個工人成日都唔煲湯。」那之之可有常煲湯給Jimmy飲？她笑說：「佢煲湯多過我，可能佢係廣東人習慣多湯水，唔似我東北人少飲湯水。」
另外，康仔對於有報道指他死性不改繼續蒲夜店，他回應說：「欲加之罪，何患無詞，我嗰日同栢芝約埋成班朋友去玩，係個健康聚會，我飲咗少少酒，但係冇揸車。對呢件事，我只係一笑置之。」至於有說有人叫張栢芝為「霆鋒嫂」一事，康仔說：「唔好咁講，佢哋嘅嘢唔好問我。」
採訪：陳梅香 攝影：羅德光